बूढो साइकल र सडक
ऊ पर ऊकालो बाटोमा हेर
पुरानो थोत्रो बूढो साइकल
कोही ठेलिरहेका छन् ।
खिइसकेका डन्डीहरू,
फुस्किन लागेका पांग्राहरू,
बांगिएका हेन्डलमा
तेस्तै फुस्रा फुटेका,
मैलो वृद्ध हत्केलाहरूले यसरी
सकिनसकी घिच्याइरहेका छन् कि
उनको यो उकाली यात्रा
कहीँ नटुंगिने त हैन ?
कतै बीचमा अडिने त छैन ?
मलाई पीर परेको छ ।
ऊ हेर त नियाली हेर,
त्यो बूढो साइकल ठेल्ने
बूढो मजदुर हर्क तामाङ चिन्नु भयो ?
ऊ जस्तै जीर्ण छ साइकल
साइकल जस्तै बूढो छ उनी
उसका खिइएका साइकल चेनहरू जस्तै
खिइरहेका होलान् उसका कमजोर आन्द्राहरू
कतै छिट्टै चुँडिने त हैन !
मलाई चिन्ताले टाउको चर्काएको छ ।
बूढोको साइकलका कष्टपूर्ण डेग जस्तै
ती वृद्ध मजदुरका आँत कहिले अड्किने त हैन !
मलाई डर छ, बूढा बा नढलून् बीच सडकमा ।
उनका जीवनका एक्ला साथी यो जीर्ण साइकल
नभाँचुन् खाल्डाहरूमा ।
ओ सडक, केही त सजिलो बनिदेऊ
केही त सानो भए पनि त्यस वृद्ध साइकललाई
सुरक्षित यात्राको हक देऊ ।
ओ सहरका पजेरो, कार, मोटरसाइकल मनुवाहरू
हतार नगर, सडकमा जाम छ,
हेर सडक कुनाहरूमा सोझा हर्क तामाङहरू र
उनका सुधा साइकलहरू
कुदिरहेका छन् ।
ओ सहरका नाइकेहरू,
बाटाहरूभन्दा चौडा तिम्रा दिमाग
फराकिलो भइदिएको भए
कठै !
यहाँ गरिब, मजदुरहरूका साइकललाई किन अपमान हुन्छ र ?
बटुवाहरूलाई सानो बाटा छिचोल्न पनि खै कता ठाम दिन्छ र ?
ओ सहरका मसिहाहरू,
तिम्रा मस्तिष्कका मेसिन,
पुराना पार्टपुर्जाहरू जाम छ,
जस्तै यहाँ अराजकहरूका लाम छ
हर्के बाहरूका साइकल जिन्दगीहरूका मलामी छ ।
चिल्ला सडकमा खस्रा आदमखोरहरू बतासिएको हेर
सिकार कतै हर्के साइकल बा र बटुवाहरू बन्नेछन् ।
सावधान !
सानातिना मेरा केटाकेटीहरू
या प्रेमिल जोडीहरूका
सपना चुँडाउने सडकका सैतानहरू,
प्रल्हाद योञ्जन या प्रवीण गुरुङहरू
ताम्राकार गौतम र कार्की ध्रुवहरूका
हैवान हत्याराहरू
तिम्रा ज्यानमारा पांग्राहरू
फुस्कियोस् सदाका लागि ।
ओ सभ्य शहर,
ओ सडकका राजाहरू,
तिम्रा ६ लेनमा बूढो हर्के बाको
झिना साइकल अटेन,
मोटर मालिकहरूले
झिना मसिना साइकललाई सहेन
शक्ति, सत्ता र सम्पत्तिमा रमेकाहरूले
गरिबका साइकललाई गनेन ।
ओ हर्क बाहरू
ओ गरिब मजदुरहरू आओ
हाम्रा बाटाहरू हामी आफैं बनाउनु पर्ने रहेछ
खोजौं सडकमा हामी आफ्नो अधिकार आफैं
सहरका शासकहरूसँग अधिकार छिनौं
सत्ताका संकीर्ण सोचहरूलाई
सडक मा पछारौं ।
आओ साइकलप्रेमीहरू,
गरौं सडक कब्जा ।
सहरसत्तामा हस्तक्षेप गरौं ।
साइकलका पाउदानीहरूमा पावर भरौं
बूढा हर्क साइकल बाहरू एक्ला छैनन् यहाँ
युवा हर्कहरू, मजदुरहरू, गरिबहरू, साइकलप्रेमीहरू
एक हौं !
सडक हाम्रो हो
सहर हाम्रो हो ।
सत्ता हाम्रो हो ।
भोलिका दिन हाम्रा हुन्,
भोलिका दिन राम्रा हुन् ।
(श्रेष्ठ साइकल अभियानकर्ता हुन्)
प्रतिक्रिया दिनुहोस !
