धनुषाः संघीय समाजवादी फोरम नेपालले प्रदेश नं. २ को मुख्यमन्त्री निर्वाचनबाटै चयन गर्ने निर्णय गरेको छ । प्रदेश नं. २ को निर्वाचनमा ठूलो दलको हैसियतले फोरम नेपालले मुख्यमन्त्री चयन प्रक्रियालाई औपचारिक ढंगले अघि बढाएको छ ।
चुनावअघि फोरम नेपाल र राजपाबीच गठबन्धन बन्ने बेला जुन ठुलो दल हुन्छै उसैको मुख्यमन्त्री हुने सहमति भएको थियो । फोरम नेपालले प्रदेश सरकारको नेतृत्व गर्नेगरी मुख्यमन्त्री चयनको गृहकार्य थालेको हो ।
जनकपुरस्थित फोरम नेपालको जिल्ला पार्टी कार्यालयमा शनिबार बसेको संसदीय दलको बैठकले मुख्यमन्त्री चयनका लागि तीन सदस्यीय निर्वाचन समिति गठन गरेको छ । पार्टी उपाध्यक्ष एवं प्रदेश नं. २ की प्रमुख रेणु यादव संयोजक र मुख्य सचिव शम्भु झा तथा सचिव शेषनारायण यादव सदस्य रहने गरी निर्वाचन समिति बनेको हो ।
फोरम नेपालका केन्द्रीय अध्यक्षउ पेन्द्र यादवको उपस्थितिमा शनिबार गठित निर्वाचन समितिले आइतबारदेखि निर्वाचन प्रक्रिया अघि बढाउनेछ । यद्यपि, औपचारिकरुपमा निर्वाचनमा जानुअघि सर्वसम्मत ढंगले मुख्यमन्त्री चयनको अधिकतम प्रयास जारी राख्ने सहमति भएको फोरम नेपालका प्रदेश सांसद सरोज सिंहले जानकारी दिए ।
सम्भव भए सर्वसम्मत नभए निर्वाचनमार्फत् चयन हुने प्रदेशको संसदीय दलको नेता नै मुख्यमन्त्रीको उम्मेदबार हुने प्रावधान छ । यसैगरी, प्रदेश सरकारको नियमावली मस्यौदा समितिको लागि सरोज सिंह र चञ्चमाया मोक्तान चयन भएका छन् ।
त्यस्तै, फोरम नेपालको नियमावली मस्यौदा तयारी समितिको संयोजकमा रामआशिष यादव तथा सदस्यमा सञ्जय यादव र पारस साह चुनिएका छन् । कार्यव्यवस्था समितिका लागि ज्ञानेन्द्र यादव र योगेन्द्र राय यादव चयन भएका छन् ।
प्रतिक्रिया दिनुहोस !
