को को बन्दैछन् प्रदेश सभाका सभामुख ?
काठमाडौं: फागुन ३ भित्र सातवटै प्रदेशमा सभामुख चयन गरिसक्नुपर्ने भएको छ । सातै प्रदेशमा सभामुख निर्वाचनको मिति तोकिएसँगै सभामुखका दाबेदारको पनि चर्चा चल्न थालेको छ । सबै प्रदेशमा को को बन्दैछन् त पहिलो प्रदेश सभामुख ?
प्रदेश १
प्रदेश १ मा सभामुखको लागि माघ २९ गते निर्वाचन हुने भएको छ । मुख्यमन्त्रीको लागि रस्साकस्सी भइरहेको प्रदेश १ मा सभामुखको चर्चा भने कमै भएको छ ।
यहाँ पनि प्रदेश सभाको पहिलो बैठकसँगै सभामुखको चर्चा हुनु थालेको छ । एमालेको बहुमत रहेको प्रदेश सभामा मुख्यमन्त्रीसँगै सभामुख पनि एमालेले पाउने भएको छ । सभामुखका लागि पाँचथर क्षेत्र नम्बर १ ‘क’का गणेशकुमार काम्वाङ र समानुपातिक सांसद उषाकला राईले दाबेदारी गरेका छन् ।
सुनसरी क्षेत्र ४ ‘ख’का सांसद जगदिश कुसियत र सर्वध्वज साँवाको नाम समेत सभामुखा चर्चामा छ । प्रदेश १ मा एमालेका सचिव भीम आचार्य र पोलिब्यूरो सदस्य शेरधन राईले मुख्यमन्त्रीको दाबी गरेको छन् । केन्द्रीय सदस्य जीवन घिमिरेको समेत मुख्यमन्त्रीमा दाबेदारी रहेको छ ।
प्रदेश २
प्रदेश २ मा मधेसवादी राष्ट्रिय जनता पार्टीले सभामुख पाउने भएको छ । प्रदेश दुईमा सबैभन्दा ठुलो दल संघीय समाजवादी फोरमले संसदीय दलको नेतामा मोहमद लालबाबु राउतलाई चयन गरेको छ ।
राउत प्रदेश २ को मुख्यमन्त्री हुने भएका छन् भने मधेसवादी दल राजपाले सभामुख पाउने छ । सभामुखमा राजपा महासचिव मनिषकुमार सुमन र वरिष्ठ उपाध्यक्ष नबल किशोर साहको चर्चा छ । मुख्यमन्त्रीकै दाबेदारी गरिरहेका सुमनलाई सभामुखको बलियो उम्मदवारको रुपमा हेरिएको छ । प्रदेश २ मा फागुन २ गते सभामुख चयन गरिनेछ ।
प्रदेश ३
प्रदेश ३ ले पहिलो सभामुख चयन गर्दैछ । माघ २७ गते प्रदेश ३ को सभामुख चयन हुनेछन् । एमालेको स्पष्ट बहुमत रहेको प्रदेश तीनमा मकवानपुर क्षेत्र नम्बर १ 'ख' का सांसद डोरमणि पौडेल सभामुखको लाइन अग्रपंतिमा छन् ।
जेष्ठ सांसदको हैसियतले पहिलो बैठकमा उनले सभामुखको भुमिका निर्वाह गरिसकेका छन् । पौडेल नभएमा मुख्यमन्त्रीको दाबेदारी गरेका अरुण नेपाल, पशुपति चौलागाईँ, केशव स्थापित र रामेश्वर फुयाँलमध्येबाट समेत सभामुख हुनसक्छन् ।
प्रदेश ३ मा पार्टी उपाध्यक्ष अष्ठलक्ष्मी शाक्य र पोलिब्यूरो सदस्य राजेन्द्रप्रसाद पाण्डेले मुख्यमन्त्री दाबेदारी गरेका छन् ।
प्रदेश ४
प्रदेश ४ मा माओवादीले सभामुख पाउने छ । प्रदेश ४ मा फागुन ३ गते प्रदेशको सभामुखको निर्वाचन हुनेछ । माओवादीबाट विजयी तनहुँ क्षेत्र २ 'क' की आशा कोइरालाले सभामुखमा दाबेदारी गरेकी छन् ।
कोइरालासँगै पर्वतका नेत्रनाथ अधिकारी र स्याङ्जाका दीपक थापा लगायतको पनि सभामुखमा चर्चा छ । प्रदेश ४ मा एमालेका सचिव पृथ्वी सुब्बा गुरुङ र प्रदेश संयोजक किरण गुरुङ मुख्यमन्त्रीका प्रतिस्पर्धी हुन् ।
प्रदेश ५
प्रदेश ५ मा माओवादीले सभामुख बनाउने छ । फागुन २ गते सभामुख चयन हुनेछ । पूर्वी रुकुमको क्षेत्र नम्बर १ ‘ख’बाट निर्वाचित पूर्णबहादुर घर्तीमगरलाई प्रस्तावित गरिएको छ ।
बाँके क्षेत्र नं. ३ ‘क’का सांसद एवम् माओवादीका पोलिब्यूरो सदस्य आइपी खरेलले पूर्णबहादुर घर्तीको नाम पार्टीले सिफारिस गरिसकेको जानकारी दिए ।
गुल्मीका सुर्दशन बरालको सभामुखका नाम चर्चामा छ । प्रदेश ५ मा एमाले स्थायी समिति सदस्य शंकर पोखरेल सर्वसम्मत एमाले संसदीय दलका नेता भइसकेका छन् । पोखरेल मुख्यमन्त्री हुने निश्चित भइसकेको छ ।
प्रदेश ६
प्रदेश ६ मा एमालेको भागमा सभामुख परेको छ । एमालेबाट मुख्यमन्त्रीको दाबेदारी गरेका प्रदेश इन्चार्ज यमलाल कँडेल र प्रकाश ज्वाला मध्ये एक सभामुख हुनेछन् । दुवैले मुख्यमन्त्री नपाउने भएपछि सभामुखमा दाबी गरेका छन् ।
कँडेल सुर्खेत क्षेत्र २ ‘क’बाट निर्वाचित भएका हुन् भने ज्वाला सल्यान क्षेत्र नम्बर १ 'ख'बाट निर्वाचित भएका हुन् । माघ २९ गते चुनाव हुँदैछ । प्रदेश ७ मा माओवादी नेता महेन्द्रबहादुर शाही र नरेश भण्डारीमध्ये एकजना मुख्यमन्त्री हुनेछन् ।
प्रदेश ७
प्रदेश ७ मा एमालेले पाउने भएको छ । प्रदेश ७ मा सभामुखका धेरै आँकाक्षी देखिएका छन् । कैलाली क्षेत्र नम्बर ४ ‘क’कादीर्घ सोडारी, डोटीकी समानुपतिक संसाद पूर्णा जोशी, कञ्चनपुर क्षेत्र नम्बर १ ‘क’का तारा लामा तामाङ र डडेधुरा क्षेत्र नम्बर १ कका पठानसिंह बोहरा र बजुरा क्षेत्र नम्बर ‘ख’ प्रकाशबहादुर शाह सभामुखका दाबेदार हुन् । प्रदेश ७ मा माघ २९ गते सभामुखका निर्वाचन हुदैछ । यो प्रदेशमा माओवादीका त्रिलोचन भट्ट मुख्यमन्त्रीका लागि सिफारिस भएका छन् ।
प्रतिक्रिया दिनुहोस !
