काठमाडौं: राष्ट्रिय सभा सदस्यको निर्वाचनको मतदान छवटै प्रदेशमा सकिएको छ । १२ वटा मतदान केन्द्रमा बिहान ७ बजे सुरु भएको मतदान दिउँसो ३ बजे समापन भएको छ ।
मतपरिणाम पनि आजै राति अबेरसम्म आइसक्ने भएको छ । प्रदेश २ बाट सबै आठजना सदस्यसहित २४ जना निर्विरोध निर्वाचित भइसकेका छन् । ३२ सिटको लागि भएको ५२ जना प्रतिस्पर्धामा थिए ।
हाम्रा सहकर्मीका अनुसार प्रदेश १ मा मतदान सकिएको छ । प्रदेश १ मा ९३ प्रदेश सभा सदस्य र स्थानीय तहका प्रमुख र उपप्रमुख २७४ गरी ३६७ मतदाता थिए ।
चार भोट खसेन
संखुवासभाको मकालु गाउँपालिका अध्यक्ष खड्गबहादुर कटवालको एक महिना अघि दुर्घटनामा ज्यान गएको थियो । त्यसैगरी चारजनाले पनि मतदान गरेनन् । उनीहरु विरामी भएर नआएको बताइएको छ ।
एमालेबाट निर्वाचित संखुवासभाको मकालु गाउँपालिका अध्यक्ष कटुवालको जीप दुर्घटनामा मृत्यु भइसकेको छ । संघीय लोकतान्त्रिक मञ्चकी बिष्णु तुम्बाहाम्फेले पार्टीको निर्णयानुसार राष्ट्रिय सभा निर्वाचन बहिष्कार गरिन् । त्यसैगरी स्थानीय तहका अन्य दुईजना प्रतिनिध विरामी भएको जनाउँदै मतदानमा उपस्थित भएनन् ।
प्रदेश ३ को अवस्था
प्रदेश ३ मा ३४८ मतदाता र १४ उम्मेदवार छन् । बिहान १० बजेदेखि ललितपुरको जाउलाखेलमा रहेको भलिबल मैदानमा १ बजे सकिएको छ ।
मनाङ्गे आएनन्
प्रदेश ४ को पनि मतदान समेत सकिएको छ । पोखरामा भएको प्रदेश ४ को निर्वाचनमा २३० मध्ये २२९ जनाले मतदान गरेका छन् । तत्कालीन पुनरावेदन अदालत पाटनबाट पाँच वर्षको सजाय पाएपछि फरार रहेका प्रदेश सभा सदस्य दीपक मनाङ्गे पोखरामा मतदान गर्न आएनन् । उनले सपथ समेत गरेका छैनन् ।
प्रदेश ५ मा २ भोट खसेन
प्रदेश ५ मा ३०३ मत खसेको छ। ३०५ मतमध्ये प्रदेश सभाको १ र स्थानीय तहको १ गरी दुई मत नखसेको निर्वाचन अधिकृतको कार्यालयले जनाएको छ । राजपाका प्रदेश सभा सदस्य बीना पन्त र संघीय समाजवादी फोरमबाट निर्वाचित बाँकेको नरैनापुरका इस्तिायक अहमद साहले मतदान गरेनन् । प्रदेश ५ मा प्रदेश सभातर्फ ८७ र स्थानीय तहमा २१८ मतदाता छन । प्रदेश ५ को मतदान दाङमा भएको थियो ।
प्रदेश ६ मा सबै मतदान
सुर्खेतको वीरेन्द्रनगरमा भएको प्रदेश ६ को राष्ट्रिय सभा सदस्यको निर्वाचनमा सतप्रतिशत मतदान भएको छ । प्रदेश ६ मा १९८ जनाले नै मतदान गरेका छन् ।
प्रदेश सभाका ४० र स्थानीय तहका १५८ जना सबै मतदानमा सहभागी भए । प्रदेश ६ मा ८ जनाकै लागि निर्वाचन भएको छ । प्रदेश ६ मा एमालेबाट ५, माओवादीबाट ३ र कांग्रेसबाट ४ गरी १२ उम्मेदवार छन् ।
प्रदेश ७ मा २२९ मध्ये २२७ जनाले मतदान गरेका छन् । डोटीको दिपायलमा भएको मतदानमा राजपाका दुई प्रदेश सभा सदस्य सहभागी भएनन् । समानुपातिक सांसद मालमति राना थारु र कैलाली क्षेत्र नम्बर १ ‘क’ का प्रदेश सभा सदस्य कृष्णकुमार चौधरीले मतदानमा सहभागिता जनाएनन् । प्रदेश ७ मा ६ जना यसअघि नै निर्विरोध भएका छन् । दलित तथा अपाङ्गता भएका र अल्पसख्यकका दुईजनाका लागि निर्वाचन भएको छ ।
प्रतिक्रिया दिनुहोस !
