माओवादी नेता शाहीलाई मुख्यमन्त्री बन्ने बाटो खुल्यो
सुर्खेत : प्रदेश ६ मा माओवादी केन्द्रको संसदीय दलको नेतामा महेन्द्रबहादुर शाही चयन भएका छन् । वीरेन्द्रनगरमा बिहीबार सम्पन्न माओवादीको प्रदेशसभा संसदीय दलको बैठकले औपचारिक रुपमा शाहीलाई दलको नेतामा चयन गरेको हो । योसँगै शाहीलाई प्रदेश ६ को मुख्यमन्त्री बन्ने बाटो खुलेको हो।
लामो रस्साकस्सीपछि माओवादीले सर्वसम्मत रुपमा दलको नेता चयन गरेको छ । यसअघि संसदीय दलको नेतामा नेता नरेश भण्डारीले पनि दाबी गर्दै आएका थिए ।
पूर्व ऊर्जामन्त्रीसमेत रहेका शाही कालिकोटको प्रदेश सभा (ख) बाट प्रदेश सभामा विजयी भएका हुन्। तत्कालीन माओवादी सेनाको छैठौं डिभिजनका कमाण्डरसमेत रहेका शाही दलको नेता चयन भएसँगै प्रदेश ६ को मुख्यमन्त्री बन्ने बाटो खुलेको हो ।
एमालेसँग चुनावी गठबन्धन गरेको माओवादीले प्रदेश ६ को मुख्यमन्त्री पाएको छ । दलको नेतामा चयन भएपछि शाहीले प्रदेश ६ को समृद्धिका लागि नेतृत्वदायी भूमिका निर्वाह गर्ने प्रतिक्रिया दिए ।