राष्ट्रियसभा सदस्य निर्वाचनको नतिजा सार्वजनिक
काठमाडौं : निर्वाचन आयोगले राष्ट्रपति विद्यादेवी भण्डारीसमक्ष राष्ट्रियसभा सदस्य निर्वाचनको मतपरिणाम सहितको प्रतिवेदन आगामी आइतबार पेश गर्ने भएको छ । निर्वाचन आयोगमा आयोजित पत्रकारसम्मेलनमा आयोगका सचिव वेगेन्द्रराज शर्माले राष्ट्रियसभा सदस्यमा राजनीतिक दलले प्राप्त गरेको सिट संख्याबारे आज औपचारिक जानकारी दिँदै उक्त कुरा बताएका हुन् ।
उनका अनुसार, राष्ट्रियसभा सदस्यमा २१ महिला र ३५ जना पुरुष निर्वाचित भएका छन् । संघीय संसद्को माथिल्लो सदनका रुपमा रहेको राष्ट्रियसभा सदस्यको निर्वाचन यहि माघ २४ गते भएको थियो ।
उक्त निर्वाचनमा नौ राजनीतिक दलले भाग लिएका थिए । नेकपा एमालेका ११, नेपाली कांग्रेसका ६, माओवादी केन्द्रका तीनजना महिला र अर्का एक दलका एक निर्वाचित भएका छन् ।
राष्ट्रियसभा सदस्यमा नेकपा एमाले २७, नेपाली कांग्रेसका १३, नेकपा माओवादी केन्द्रका १२, राष्ट्रिय जनता पार्टीका दुई र संघीय समाजवादी पार्टी नेपालका दुईजना उम्मेदवार निर्वाचित भएका छन् ।
प्रत्येक प्रदेशबाट तीन महिला, एक दलित, एक अपांग वा अल्पसंख्यकसहित आठ जनाका दरले राष्ट्रियसभामा प्रतिनिधित्व हुने संवैधानिक व्यवस्था रहेको छ । ५९ सदस्यीय राष्ट्रियसभामा तीन जना भने सरकारको सिफारिसमा राष्ट्रपतिले मनोनयन गर्ने व्यवस्था छ । रासस