काठमाडौँः इङ्लिस प्रिमियर लिग अन्तरगत शनिबार राति भएको नर्थ लण्डन डर्बीमा टोटनह्यामले आर्सनललाई पराजित गरेको छ ।
वेम्बली स्टेडियमा भएको प्रिमियर लिगको टप फोरका लागि भएको भिडन्तमा ह्यारी केनले दोस्रो हाफको सुरुवातमै गरेको गोलमा टोटनह्यामले बाजी मारेको हो ।
बेन डेभिसले उपलब्ध गराएको क्रसलाई सदुपयोग गर्दै केनले खेलको ४९ औँ मिनेटमा हेडमार्फत गोल गर्दै टोटनह्यामलाई ३ अंक दिलाउन सफल भएका हुन् ।
जनवरी ट्रान्सफर विन्डोमा केही उत्कृष्ट खेलाडी भित्र्याए पनि आर्सनलले टोटनह्यामलाई रोक्न असफल रह्यो । यो जितपछि २७ खेलबाट ५२ अंकसहित लिगको तेस्रो स्थानमा उक्लिएको छ । उसले नयाँ सिजनको च्याम्पियन्स लिग खेल्ने सम्भावनालाई पनि बलियो बनाउँदै लगेको छ ।
अर्कातिर पराजित आर्सनल समान २७ खेलबाटै ४५ अंकसहित लिगको पाँचौ स्थानमा छ । उसले नयाँ सिजनमा च्याम्पियन्स लिग खेल्न अझै कडा मेहनत गर्नुपर्ने देखिएको छ ।
प्रतिक्रिया दिनुहोस !
