आयोजकलाई स्तब्ध पार्दै मोरङ सेमिफाइनलमा
सिमरा : आयोजक नव जनजागृति युवा क्लबलाई टाइब्रेकरमा स्तब्ध पार्दै मोरङ फुटबल क्लब सिमरामा जारी रुस्लान नवौं सिमरा गोल्डकपको सेमिफाइनलमा प्रवेश गरेको छ । सिमरा गोल्डकपमा पहिलोपटक सहभागिता जनाएको मोरङले आयोजकलाई ४-१ गोलले हरायो ।
सिमरा रंगशालामा शनिबार भएको खेलको निर्धारित समयमा दुवै टोलीले १-१ गोलको बराबरी खेलेपछि मोरङको भाग्य टाइब्रेकरमा चम्किएको थियो । टाइब्रेकरमा मोरङका दीपक राई, विक्रम लिम्बू, बुद्धिमन राई र निरज बस्नेतले गोल गरे । आयोजकका विजय श्रेष्ठले बाहेक अन्य खेलाडीको प्रहारले पोस्टको दिशा लिन नसक्दा पराजय भोग्नु पर्यो । सौरभ मगर र मानबहादुर तामाङको प्रहार पोस्ट नजिकैबाट बाहिर हुइँकिएको थियो ।
आयोजक जनजागृतिले खेलमा लिएको अग्रता कायम राख्न नसक्दा नतिजा मोरङलाई सुम्पन बाध्य भयो । ६६औं मिनेटमा विजय श्रेष्ठले गोल गर्दै घरेलु दर्शकलाई खुसी दिलाए । तर, घरेलु टोलीको खुसी धेरै बेर टिक्न सकेन । राजीव लोप्चनको स्थानमा मैदान पसेका विजयले तीन मिनेटमै गोल गरेका थिए । मोरङका गोलरक्षक सूर्य क्षेत्री अगाडि बढेको मौकाको फाइदा उठाउँदै डीबक्स भित्रबाट विजयले गरेको प्रहारले सहजै जाली चुमेको थियो । ७६औं मिनेटमा भुवन बस्नेतले गोल गर्दै मोरङलाई खेलमा फर्काएका थिए । योगेश गुरुङले मिलाएको पासलाई सदुपयोग गर्दै भुवनले गोल गरेका थिए।
करिब चार हजार घरेलु दर्शकको समर्थन पाएको आयोजक र मोरङबीचको खेल निकै रोमाञ्चक रह्यो । कर्ण लिम्बू, दीपक राई, विक्रम लिम्बू, योगेश गुरुङजस्ता खेलाडी चल्न नसक्दा जितका लागि मोरङले निकै संघर्ष गर्नुपर्यो । आयोजकका धीरज श्रेष्ठले ६१औं मिनेटमा गोल गर्ने अवसर चुकाउँदा निराश देखियो । भिक्टरको क्रसमा धीरजले गरेको हेड प्रहार फितलो बनेको थियो । खेलको म्यान अफ दी म्याच आयोजकका सुशान्तसिंह ठकुरी घोषित भए ।
आयोजकका प्रशिक्षक नवीन महर्जनले अन्तिम समयमा सम्हालिन नसक्दा पराजय बेहोरेको बताए । मोरङका प्रशिक्षक पारस चौधरीले लगातारको खेल र यात्राले खेलाडी थाक्दा सोचेजस्तो खेल्न नसकेको बताए । आइतबार त्रिभुवन आर्मी क्लब र एपीएफ क्लबबीच प्रतिस्पर्धा हुनेछ ।