म्यानचेस्टर युनाइटेड हार्यो, लिभरपुल एक स्थान उक्लियो
काठमाडौं : इंग्लिस प्रिमियर लिगको अंक तालिकामा दोस्रो स्थानमा रहेको म्यानचेस्टर युनाइटेड आइतबारको खेलमा न्यूक्यासल युनाइटेडसँग १-० को हार व्यहोर्दा उपाधि होडबाट झन पछाडि धकेलिएको छ ।
न्यूक्यासलको घरेलु मैदानमा भएको खेलमा पहिलो हाफ गोलरहित बराबरीमा रोकिएको थियो । न्यूक्यासलका लागि ६५ औं मिनेटमा मिडफिल्डर मात रिचीले गरेको गो नै निर्णायक बन्यो । हारका बाबजुद पनि २७ खेल खेल्दा ५६ अंक रहेको म्यानचेस्टर युनाइटेड दोस्रो स्थानमा कायम छ । शीर्ष स्थानको म्यानचेस्टर सिटीको २७ खेलबाट ७२ अंक रहेको छ।
आइतबार भएको इग्लिस प्रिमियर लिगको अर्को खेलमा लिभरपुलले साउथह्याम्टनमाथि २-० को जित हात पारेको छ । रोबर्टो फिर्मिनोले खेलको ६ मिनेटमा गोल गरी लिभरपुललाई अग्रता दिलाएका थिए । मोहमद सालहले ४२ मिनेटमा गोल गरे ।
जितपछि २७ खेलबाट ५४ अंक बनाएको लिभरपुल टोटनह्यामलाई उछिन्दै अंक तालिकाको तेस्रो स्थानमा उक्लिएको छ । समान खेल खेलेको टोटनह्यामको ५२ अंक रहेको छ ।
प्रतिक्रिया दिनुहोस !
