प्रदेश १ का सभामुखले लिए सपथ, आजै पदभार ग्रहण
विराटनगर : प्रदेश नम्बर १ का सभामुख प्रदीप भण्डारीले सोमबार सपथ लिएका छन् । प्रदेश प्रमुख प्रा.डा. गोबिन्दबहादुर तुम्बाले एक समारोहबीच भण्डारीलाई पद तथा गोपनियताको सपथ गराएका हुन् ।
प्रदेश प्रमुख निवास सुनसरी मोरङ सिँचाइ आयोजना कार्यालय परिसरमा आयोजित कार्यक्रममा भण्डारीले सपथ लिएका हुन् । सपथ ग्रहण समारोहमा प्रदेश १ का प्रदेश सभा सदस्य, प्रदेश मुख्य सचिव, राजनीतिक दलका प्रतिनिधि, सुरक्षा निकायका अधिकारी र प्रदेशका मन्त्रालयका सचिव तथा कर्मचारीको उपस्थिति थियो ।
आइतबार एमाले संसदीय दलको बैठकले भण्डारीलाई सभामुख बनाउन सर्वसम्मत निर्णय गरेको थियो । सोमबारको प्रदेशसभाको बैठकमा सभामुख चयन गर्न भण्डारीको नाममा मात्र प्रस्ताव परेपछि बैठकको अध्यक्षता गर्ने ज्येष्ठ सदस्य ओमप्रकाश सरागवीले उनलाई निर्विरोध निर्वाचित भएको घोषणा गरेका थिए । भण्डारीको पक्षमा सांसद तुलसी न्यौपानेले प्रस्ताव र तेह्रथुमका सांसद लक्षुमन तिवारीले समर्थन गहेका थिए ।
सभामुख भण्डारीले आजै बस्ने प्रदेश सभाको अर्को बैठकमा पदभार ग्रहण गर्ने कार्यक्रम रहेको संघीय मामिला तथा संसद सचिवालयले जनाएको छ ।
प्रतिक्रिया दिनुहोस !
