प्रचण्डले भनेः नेतृत्व गर्नेे अवसर अब हाम्रो काँधमा
काठमाडौँः नेकपा माओवादी केन्द्रका अध्यक्ष पुष्पकमल दाहाल प्रचण्डले नयाँ पार्टीको नेतृत्व गर्ने अवसर आफूहरुको काँधमा आएको बताएका छन् ।
पार्टी मुख्यालय पेरिसडाँडामा आयोजित २३ औँ जनयुद्ध दिवसको कार्यक्रमलाई सम्बोधन गर्दै अध्यष दाहालले पार्टी एकता गरेर कम्युनिष्ट आन्दोलनलाई एक बनाउने अवसरलाई गुम्न दिन नहुने बताएका हुन् ।
‘कम्युनिष्ट आन्दोलनलाई एक बनाएर नेतृत्व गर्ने अवसर हामीलाई आएको छ’, उनले भने , ‘हामीलाई प्राप्त भएको यो अवसरलाई गुम्न दिनुहुँदैन ।’
पटक पटक भावुक हुँदै बोलेको अध्यक्ष दाहालले नेतृत्व भने सहजरुपमा प्राप्त नहुने पनि उल्लेख गरे । ‘नेतृत्व भनेको सक्रियता, क्षमता, त्याग र तपस्याबाट लिनुपर्ने हो, कसैले दिँदैन’, दाहालले जोड दिए, ‘त्यो सुयोग्य अवसर हामीलाई प्राप्त भएको । महान बहसबाट मात्रै महान क्रान्ति सम्भव छ, एकताको बहसबाट कोही पनि नभागौँ ।’
साम्राज्यवादी र सामन्तवादीहरु एकता प्रक्रिायको विरुद्धमा रहेको उल्लेख गर्दै अध्यक्ष दाहालले आफ्नो पार्टी छाडेका नेत्रविक्रम चन्द र मोहन वैद्यलाई पनि सम्बोधनको प्रयास गरे ।
‘साम्राज्यवादी र सामन्तवादीहरु एकताको विपक्षमा छन्’, उनले भने, ‘एकताको महान बहस छाडेर तपाईँहरु साम्राज्यवादी र प्रतिक्रियावादीमध्ये कता ?’
अध्यक्ष दाहालले सोमबार एमाले अध्यक्ष केपी ओलीसँग भएको वान टु वान वार्तामा एमाले नेतृत्वले जनयुद्धको ऐतिहासिक भूमिका र महत्व थियो भन्ने स्वीकारेकाले पार्टी एकता प्रक्रिया निर्णायक मोडमा पनि पुगेको दाबी गरे ।