विप्लव र वैद्यलाई प्रचण्डको सन्देशः जनताबाट भागेर क्रान्ति हुँदैन

काठमाडौँः जनयुद्धको २३ औँ वार्षिकोत्सव मनाउन पार्टी मुख्यालय पेरिसडाँडामा मंगलबार आयोजित कार्यक्रममा नेकपा माओवादी केन्द्रका अध्यक्ष पुष्पकमल दाहाल प्रचण्ड भावुक देखिए ।

२०५२ सालदेखि १० वर्षसम्म आफ्नो नेतृत्वमा सञ्चालित जनयुद्धका आफ्ना दुई सहयात्रीलाई सम्झिँदै उनले जनताबाट भागेर क्रान्ति हुन नसक्ने सन्देश पनि दिए ।

भावुक शैलीमा मन्तव्य दिने क्रममा उनले जनयुद्धका आफ्ना सहयात्रीहरु मोहन वैद्य किरण र नेत्रविक्रम चन्द विप्लवलाई फकाउने कोशिस पनि गरे ।

प्रचण्ड नेतृत्वको माओवादीले बाटो बिराएको भन्दै बाहिरिएका वैद्य र विप्लवले अहिले अलग अलग कम्युनिष्ट पार्टी चलाइरहेका छन् ।
‘रहर गरेर मात्रै क्रान्ति हुन सक्दैन, क्रान्तिको दिवास्वप्नबाट ब्युँझनुस्’, दाहालले भने, ‘जनताको साथ बिना क्रान्ति हुनै सक्दैन र जनतासँग भागेर पनि क्रान्ति हुँदैन ।’

नेत्रविक्रम चन्द विप्लव नेतृत्वको नेपाल कम्युनिष्ट पार्टीका करिब १०० कार्यकर्ता आफ्नो पार्टीमा प्रवेश गरेको सन्दर्भमा दाहालले यस्तो सन्दर्भ जोडेका हुन् ।

पढ्नुस्: प्रचण्डले भनेः नेतृत्व गर्नेे अवसर अब हाम्रो काँधमा

 

त्यसैगरी उनले आफ्ना गुरु मोहन वैद्यलाई पनि सन्देश दिए । ‘मेरा गुरु भनेर परिचित मोहन वैद्यलाई पनि मेरो आग्रह द्वन्द्वात्मक भौतिकवाद र अतिभूतवादको फरक के हो ?’, उनले सोधे, ‘किताब लेख्न पढ्न त सकिन्छ तर जीवनमा लागू गर्न पनि सक्नुपर्छ । त्यसका लागि जनता जहाँ छन् जानुपर्छ जनताबाट भागेर क्रान्ति हुँदैन ।’

उनले दुवै नेतालाई एकै ठाउँमा आउन पनि अपिल गरे । ‘मेरो गम्भीर र हार्दिक अपिल छ एकै ठाउँमा आउनुस् समृद्धि र समाजवादका लागि एक बनौँ’, दाहालले थपे, ‘साम्राज्यवादीहरु एकता प्रक्रिायाको विरुद्धमा छन् तपाईँहरु सामज्रावादी र प्रतिक्रियावादी मध्ये कता ?’