सैन्य पोशाकमा परेड खेल्दै निस्किए माओवादी (फोटो फिचर)
नेपालगन्जः मङ्गलवार दिउँसो हरियो कम्व्याक्टमा सजिएका युवाहरू लस्करै सडक कब्जा गरेर अगाडि बढ्दै थिए । बाजागाजासहित सडक कब्जा गरेर अघि बढिरहेका युवाहरूको ताँतीले नेपालगन्जका नागरिकको ध्यान तान्यो । छापामार शैलीमा आएका युवाहरू अरू कोही नभएर नकमा क्रान्तिकारी माओवादीका कार्यकर्ता थिए ।
शान्ति सम्झौता भएको ११ वर्षपछि माओवादी छापारमारको झल्को मंगलबारको मार्चपासले दिलायो । बाँके र बर्दियाका माओवादी युवाहरू सम्मिलित समूहले नेपालगन्जको चारलेन सडक नै कब्जा गरेर आफ्नो जनयुद्धको झल्को दिएका थिए ।
जनयुद्धकालिन छापामार पोसाकमा आएका माओवादी कार्यकर्ताहरूले सशस्त्र विद्रोहको सम्झनामा २३ औँ जनयुद्ध दिवस मनाए । बाजागाजासहित आएका युवाहरूको ताँतीलाई नेपाल प्रहरीले सुरक्षा दिइरहेको थियो । धम्बोजी चोकमा पुगेपछि उनीहरूले आफ्नो स्थापना दिवस मनाउँदै अँझै क्रान्ति पुरा नभएको बताए ।
मङ्गलवार माओवादीका विभिन्न घटकले मङ्गलवार बाँकेमा २३ औँ जनयुद्ध फरक–फरक कार्यक्रम गरी मनाएका छन् । २०५२ साल फागुन १ गते तत्कालीन नेकपा माओवादीले सुरु गरेको सशस्त्र विद्रोहको सम्झनामा माओवादीका विभिन्न घटकले जनयुद्ध दिवस मनाउने गरेका छन् ।
शान्ति सम्झौतापछि सबैभन्दा ठुलो संसदीय दल बनेको माओवादी आन्तरिक लडाइका कारण टुक्रा–टुक्रामा विभाजित भएको छ । विभाजित समूहका कार्यकर्ताले फरक–फरक स्थानमा फरक नाराका साथ जनयुद्ध दिवसलाई सम्झिए ।
सशस्त्र विद्रोह सुरु गरेको दिनलाई सम्झँदै नेकपा माओवादी केन्द्र, नेकपा क्रान्तिकारी माओवादी र नेपाल कम्युनिस्ट पार्टीले छुट्टाछुट्टै कार्यक्रम गरेका छन् । दिवसको अवसरमा बाँके, वर्दियाका नेकपा क्रान्तिकारी माओवादीले नेपालगन्ज, खजुरा लगायतका ठाउँहरूमा नारा जुलुस गर्दै र्याली निकालेका छन् ।
उनीहरू सैन्य पहिरनसहित नारा लगाउँदै र्यालीमा सहभागी भएका थिए । क्रान्तिकारी माओवादीको र्यालीलाई नेपाल प्रहरीले सुरक्षा दिएको थियो । उमेर पाकेका जेष्ठ नागरिकदेखि बालबालिकासम्मले माओवादीको तत्कालीन सैन्य पहिरनमा सडकमा उर्लिएका क्रान्तिकारी माओवादीले नयाँ जनवादी क्रान्ति समाप्त नभएको बताए । जनयुद्धले परिकल्पना गरेको शासन प्रणाली नआएको भन्दै क्रान्ति अझै आवश्यक रहेको क्रान्तिकारी माओवादी नेताहरूको भनाइ थियो ।
उनीहरूले नयाँ जनवादी क्रान्ति जिन्दाबाद, जनमुक्ति सेना नेपाल जिन्दाबाद, जनताको सुरक्षा सुनिश्चित गर, सम्पूर्ण उत्पीडित जनता एक हौ लगायतका नारा लगाएका थिए । उनीहरूले वर्तमान संविधानले सबै नागरिकको समस्या सम्बोधन नगरेको भन्दै संविधान खारेजीको माग समेत गरेका छन् ।
र्यालीपछिको कोणसभामा बोल्ने क्रान्तिकारी माओवादीका नेताले वर्तमान राजनीतिक खिचातानीका कारण देश आन्तरिक गृहयुद्धमा फस्ने चेतावनी दिएका थिए । साथै उनीहरूले जनताले आवश्यक महसुस गरे देशको स्वाभिमान रक्षाका लागि हतियार उठाउन समेत पछि नपर्ने चेतावनी दिएका छन् ।