त्रिलोचन भट्ट भए मुख्यमन्त्री
धनगढी : प्रदेश ७ प्रमुख मोहनराज मल्लले डोटीबाट प्रदेश सभा ‘ख’मा निर्वाचित त्रिलोचन भट्टलाई मुख्यमन्त्रीमा नियुक्त गरेका छन् । धनगढीको उत्तरबेहडीस्थित प्रदेश प्रमुखको कार्यालय पुगेका भट्टलाई प्रदेश प्रमुख मल्लले नियक्तिपत्र एवं खादा ओढाएर बधाईसमेत पनि दिए ।
प्रदेश प्रमुखको सचिवालयले फागुन ५ गते दिउँसो ३ बजे मुख्यमन्त्रीको शपथ ग्रहण कार्यक्रम हुने जानकारी दिएको छ । प्रदेश प्रमुखको कार्यालयमै मुख्यमन्त्रीको शपथ ग्रहणको तयारी सुरु गरिएको प्रदेश प्रमुखको सचिवालयका उपसचिव हीरालाल चौधरीले बताए ।
बुधबार एमालेका २१ र माओवादी केन्द्रका १४ गरी ३५ जना प्रदेश सदस्यले भट्टलाई आफूहरूको समर्थन रहेको जनाएपछि उनले मुख्यमन्त्रीमा दाबी पेस गरेका थिए । एमालेबाट अनुपस्थित दार्चुलाका प्रदेशसभा सदस्य गेल्बु बोहरा र अछामका हर्कबहादुर कुँवरले बिहीबार भट्टको समर्थनमा प्रदेश प्रमुखको कार्यालय पुगेरै समर्थन जनाएका छन् ।
५३ सदस्यीय प्रदेशसभामा भट्टको पक्षमा ३७ जना अथवा दुईतिहाई बहुमत पुगेको छ ।
५३ सदस्यीय प्रदेशसभामा भट्टको पक्षमा ३७ जना अथवा दुईतिहाई बहुमत पुगेको छ । एमालेबाट सभामुख अर्जुनबहादुर थापाले हस्ताक्षर गर्न नपाउने भएपछि भट्टको पक्षमा गठबन्धनका ३७ जनाले समर्थन जनाएका हुन् ।
बढ्दै छन् मन्त्रालय
बिहीबार प्रदेश ७ मा आर्थिक मामिला तथा योजना मन्त्रालय स्थापना गरिएको छ । प्रदेश ७ का प्रमुख सचिव लक्ष्मीराम पौडेलले साविकको क्षेत्रीय सिँचाइ निर्देशनालयको पहिलो तलामा आर्थिक मामिला तथा योजना मन्त्रालय स्थापना गरेका छन् ।
आर्थिक मामिला तथा योजना मन्त्रालयका सचिव शंकरकृष्ण श्रेष्ठले पनि बिहीबार नै पदस्थापन गरेका छन् । आर्थिक एवं वित्तीय नीति हेर्ने मन्त्रालयले प्रदेशको समृद्धिको खाका कोर्ने उनले बताए ।
क्षेत्रीय सिँचाइ निर्देशनालयको भुइँतलामा भौतिक पूर्वाधार विकास मन्त्रालयको पनि तयारी भइरहेको छ । कार्यालयमा रङरोगन र मर्मतसम्भार सुरु गरिएको छ । भौतिक पूर्वाधार विकास मन्त्रालयमा भने अहिलेसम्म सचिवसहितका कर्मचारी तोकिएका छैनन् ।