शिक्षालाई प्रविधिसँग जोडौं : राष्ट्रपति
गुल्मी : राष्ट्रपति विद्यादेवी भण्डारीले अबको शिक्षालाई प्रविधिसँग जोड्नुपर्ने बताएकी छन् । सरकारले गरेको शिक्षा क्षेत्रको लगानीको प्रतिफल सोचेअनुसार हासिल गर्न नसकिएको बताउँदै उनले अब प्रविधिमैत्री बन्नुपर्ने धारणा राखिन् ।
मुसिकोट नगरपालिका–६ कुर्घा गुल्मीस्थित त्रिभुवन माध्यमिक विद्यालयको स्वर्ण महोत्सवको उद्घाटन गर्दै भण्डारीले शिक्षा क्षेत्रको विकासबिना मुलुक समृद्धितर्फ अघि बढ्न नसक्ने उल्लेख गरिन् ।
‘विश्वका विकसित देशहरुले फड्को मार्नुको मुल कारण भनेकै शिक्षा नीति नै हो’, भण्डारीले भनिन्, ‘आर्थिक अभाव, चेतना र विपन्नताका कारणले गर्दा अझैसम्म पनि हरेक नेपालीको शिक्षामा पहुँच पुग्न सकेको छैन ।’ उनले शिक्षामा भइरहेको कमी कमजोरीलाई औल्याउँदै गुणस्तरीय शिक्षा प्रदान गर्नतर्फ अघि बढ्नुपर्ने बताइन् ।
‘शिक्षा क्षेत्रको गुणस्तर बढाउन सरकारकै मात्र मुख ताक्नु राम्रो होइन’, राष्ट्रपति भण्डारीले भनिन्,‘स्थानीय क्षेत्रले पनि यसतपर्फ चासो दिनुपर्छ ।’ गाउँगाउँमा स्थानीय सरकार आइसकेकाले स्थानीय तहले नै अबको शिक्षालाई गुणस्तरीयता र प्रविधिमैत्री बनाउनुपर्ने उनको जोड थियो । दक्ष जनशक्ति उत्पादनका लागि प्रविधिसँग अबका पुस्तालाई जोड्नुपर्ने उनको भनाइ छ । जिल्लाको त्रिभुवन माविलाई प्राविधिक शिक्षाको शैक्षिक केन्द्रको रुपमा स्थापित गर्न सबै लाग्नुपर्ने समेत उनले बताइन् ।
शुक्रवार नै राष्ट्रपति भण्डारीले गुल्मीको रुरु क्षेत्रको दर्शनसँगै कालीगण्डकी नदीमा स्नान गरेकी छिन्। जिल्लाको रिडिस्थित रुरु संस्कृति तथा साधारण माविको सतवार्षिकीको उद्घाटन समारोहमा पुगेको अवसरमा उनले स्नान गरेकी हुन् ।
प्रतिक्रिया दिनुहोस !
