मनाङको विजयी सुरुवात
हेटौंडा : तेस्रो टुबोर्ग हेटौंडा गोल्डकप फुटबल प्रतियोगितामा मनाङ मस्र्याङ्दीले विजयी सुरुवात गरेको छ । हेटौंडामा शनिबारदेखि सुरु भएको प्रतियोगिताको उद्घाटन खेलमा मनाङले एपीएफ क्लबलाई १-० गोलले हरायो । मनाङले सेमिफाइनलमा आर्मी र सुदूरपश्चिम-११ बीचको विजेतासँग प्रतिस्पर्धा गर्नेछ ।
मनाङको जितमा २८औं मिनेटमा सुजल श्रेष्ठले पेनाल्टीको सदुपयोग गर्दै गरेको गोल नै निर्णायक बन्यो । एपीएफका सुरज गुरुङले मनाङका भिक्टरलाई लडाएपछि प्राप्त पेनाल्टीलाई श्रेष्ठले गोलमा परिणत गरेका थिए । एपीएफका अञ्जन विष्ट म्यान अफ दी म्याच घोषित भए । उनले पाँच हजार रुपैयाँ प्राप्त गरे ।
फागुन १२ गतेसम्म हेटौंडामा सञ्चालन हुने प्रतियोगितामा ‘ए’ डिभिजन क्लब थ्रीस्टार, मनाङ मस्र्याङ्दी, नेपाल पुलिस, आर्मी, एपीएफ, संकटासहित हेटौंडाको विजय युथ र सुदूरपश्चिम-११ को सहभागिता रहेको छ । प्रतियोगिताको विजेताले पाँच लाख र उपविजेताले तीन लाख रुपैयाँ पुरस्कार प्राप्त गर्नेछन् । प्रतियोगिताका उत्कृष्ट विधाका खेलाडी र प्रशिक्षकले जनही १५ हजार रुपैयाँ प्राप्त गर्नेछन् ।
प्रतिक्रिया दिनुहोस !
