काठमाडौँः दुई पार्टीको एकतालाई अन्तिम रुप दिन आज (आइतवार) पनि नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डबीच वान टु वान वार्ता भइरहेको छ ।
नेकपा माओवादी निकट व्यवसायी दुर्गा प्रसाईको भक्तपुरस्थित घरमा यी दुई नेताबीच अहिले वान टु वान वार्ता जारी रहेको छ । नयाँ पार्टीको सैद्धान्तिक विचारधारा र नेतृत्व बाँडफाँटमा कुरा नमिलिरहेका बेला दुई नेता एकतालाई निचोडमा पुर्याउन जुटेका हुन् ।
गृहकार्य अझै बाँकी रहेको भन्दै दुई नेताले मात्रै वार्तामा बस्ने भनेपछि आजै हुने भनिएको एकता संयोजन समितिको बैठक पनि स्थगित भएको छ ।
दुई नेताले आज वार्तास्थल पनि फेरेका हुन् । यसअघि भानववनस्थित माओवादी निकट व्यवसायी शारदाप्रसाद अधिकारीको घरमा वार्ता गर्दै आएका ओली–प्रचण्ड आज झापाको बिर्तामोडस्थित बी एन्ड सी अस्पतालका सञ्चालक दुर्गा प्रसाईको भक्तपुरस्थित घरमा पुगेका हुन् ।
दुई नेताले वान टु वान वार्तालाई निरन्तरता दिएर भोलिसम्ममा सबै कुरालाई निकाश दिने तयारी गरेका स्रोतले बताएको छ । एमाले र माओवादीबीच पार्टीले अवलम्बन गर्ने सिद्धान्त र नेतृत्वमा कुरा मिलेको छैन । अर्कातिर माओवादीले सरकारमा जाने नेताको टुंगो गर्न नसक्दा पनि एकता प्रभावित भइरहेको छ ।
दुई नेताबीच नयाँ पार्टीको नाम र सांगठानिक संरचनाबारे करिब कुरा मिलिसकेको छ । यसअघि माओवादीले सबै कुरा प्याकेजमै टुंग्याउने बताएपछि नेकपा माओवादी केन्द्र ओली नेतृत्वको सरकारमा पनि गएको छैन ।
प्रतिक्रिया दिनुहोस !
