पोखरा : प्रदेश ४ को उपसभामुखमा एमालेकी सिर्जना शर्मा निर्वाचित भएकी छन् । प्रदेश सभामा आइतबार भएको निर्वाचनमा उनले दुई प्रतिस्पर्धी कांग्रेसकी मनकुमारी गुरुङ र राष्ट्रिय जनमोर्चाकी पियारी थापालाई पराजित गरेकी हुन्।
शर्माको पक्षमा हुन्छ भन्ने ३८ सांसद हुँदा हुन्न भन्ने १८ थिए । शर्मालाई उपसभामुख निर्वाचित गरियोस् भनेर एमालेका मायानाथ अधिकारीले राखेको प्रस्तावमा माओवादी सांसद गायत्री गुरुङले समर्थन जनाएकी थिइन् । सुरुमै शर्माको पक्षमा बहुमत देखिएपछि सभामुखले उनी निर्वाचित भएको घोषणा गरेका थिए ।
अखिल नेपाल महिला संघकी केन्द्रीय सचिव शर्मा एमाले प्रदेश ४ कमिटीकी सदस्य पनि हुन् । उपसभामुख निर्वाचित भएलगत्तै शर्माले आफू पार्टीभन्दा माथि उठेर जिम्मेवारी पूरा गर्ने बताइन् । उपसभामुख शर्मालाई सभामुख नेत्रनाथ अधिकारीले सपथ गराएका थिए ।
उपसभामुखमा कांग्रेस उम्मेदवार मनकुमारी गुरुङलाई सांसद विन्दुकुमार थापाको प्रस्ताव र ओमकला गौतमको समर्थन थियो । प्रस्तावक थापाले सभामुख र उपसभामुख दुई भिन्न पार्टी र फरक लिंगका हुनुपर्ने संवैधानिक व्यवस्था ख्याल गरी कांग्रेसले उम्मेदवारी दिएको बताएका थिए ।
उनले एमाले र माओवादीबीच एकता हुन लागेको हुँदा उपसभामुख कांग्रेसले पाउनुपर्ने दाबी पनि गरे । त्यस्तै एक फरक प्रसंगमा नेपाली कांग्रेस प्रजातान्त्रिक पार्टी भएको र आगामी दिनमा रचनात्मक र सशक्त विपक्षको भूमिका रहने विचार व्यक्त गरे । यसअघि प्रदेश ४ को सभामुखमा माओवादीका नेत्रनाथ अधिकारी निर्वाचित भइसकेका छन् । उनी माओवादीबाट निर्वाचित सांसद हुन् ।
प्रतिक्रिया दिनुहोस !
