काठमाडौँः नेकपा एमालेका अध्यक्ष तथा प्रधानमन्त्री केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डबीच पार्टी एकतालाई लिएर आइतवार पनि भक्तपुरमा एक्ला एक्लै वार्ता भयो ।
माओवादीनिकट व्यवसायी दुर्गा प्रसाईको भक्तपुरस्थित घरमा केही घण्टा वार्ता गरेपछि दुई अध्यक्ष सिंहदरबारस्थित एमाले संसदीय दलको कार्यालयमा पुगे । जहाँ ओली नेतृत्वको वाम सरकारको कामको प्राथमिकता तय गर्न एमाले उपाध्यक्ष वामदेव गौतमको संयोजकत्वमा बनेको कार्यदलको बैठक थियो ।
त्यस बैठकमा पनि दुई अध्यक्ष पार्टी एकता केही दिनमै निचोडमा पुग्ने व्याख्या गरे । त्यसपछि दुई नेताको उपस्थितिमा सरकारलाई सुझाव दिन बनेको कार्यदलको बैठक बस्यो । जसले ओली नेतृत्वको वाम सरकारको कामको प्राथमिकता तय गरेको छ ।
यो बैठकपछि बाहिरिएका एमाले उपाध्यक्ष वामदेव गौतमले दुई पार्टी एकताबीचको एकताबारे रोचक प्रतिक्रिया दिए । ‘पार्टी एकता भइसकेको ‘ता’ मात्रै बाँकी छ’, गौतमले पत्रकारहरुसँग भने, ‘भोलिसम्ममा सबै कुराको टुंगो लागिसक्छ ।’
गौतमले अब दुई पार्टीबीचको सरकारले पूर्णता पाउने पनि उल्लेख गरे । ‘पार्टी एकता भइसकेको छ, अब घोषणा हुन मात्रै बाँकी हो’, उनले भने, ‘प्रतिनिधि सभाको अधिवेशनपछि यसको औपचारिक घोषणा हुन्छ ।’
प्रतिक्रिया दिनुहोस !
