पदभार ग्रहण लगत्तै प्रदेश ७ का मुख्यमन्त्री अस्पतालको निरीक्षणमा
धनगढी : प्रदेश ७ का मुख्यमन्त्री त्रिलोचन भट्टले आइतबार पदभार ग्रहण गरेका छन् । धनगढीको मेनरोडमा निर्माणकै क्रममा रहेको मुख्यमन्त्री तथा मन्त्रिपरिषदको कार्यालय पुगेर आइतबार पदभार ग्रहण गरेका हुन् ।
पदभार ग्रहणपछि मुख्यमन्त्री भट्टले प्रदेश नम्बर ७ लाई एक नम्बर प्रदेश बनाउने दाबी गरे । ‘हामीसँग सम्भावना छन्, जलस्रोत, जडिबुटी, कृषि र पर्यटनका माध्मबाट प्रदेश समृद्ध बनाउने मात्रै होइन, एक नम्बरको प्रदेश बनाउँछु’, उनले भने ।
उनले अहिले विकास निर्माणका काम पनि कछुवा गतिमा भइरहेकाले प्रदेश सरकार योजनालाई शीघ्र निर्माण गराउनेमा जोड गर्ने बताए । मुख्यमन्त्री तथा मन्त्रिपरिषदको कार्यालयमा नेपाल प्रहरीको एक टुकडीले सलामीसहित प्रदेशका प्रमुख सचिव लक्ष्मीराम पौडेल तथा मुख्यमन्त्री तथा मन्त्रिपरिषदको कार्यालयका सचिव प्रदिपराज कँडेलले उनलाई फूलमालासहित स्वागत गरे।
मुख्यमन्त्रीसँगै अन्य ६ मन्त्रीले पनि आइतबार नै पदभार ग्रहण गरेका छन् । आन्तरिक मामिला तथा कानुन मन्त्री प्रकाशबहादुर शाहले साविकको कृषि विकास कार्यालयमा स्थापना गरिएको मन्त्रालयमा पुगेर पदभार ग्रहण गरे । प्रदेशको शान्ति सुरक्षा दुरुस्त बनाउने शाहले प्रतिबद्धता गरे ।
आर्थिक मामिला तथा योजना मन्त्री झपट बोहरा र भौतिक पूर्वाधार विकास मन्त्री पठानसिंह बोहराले साविकको क्षेत्रीय सिंचाई निर्देशनालयमा स्थापना भएको मन्त्रालयमा पदभार ग्रहण गरे । अर्थमन्त्री बोहराले प्रदेश नम्बर ७ मा हुने खर्चको १६ प्रतिशत मात्रै राजश्व भएकाले राजश्वका दायरा बढाएर प्रदेशलाई आत्मनिर्भर बनाउने योजना बनाइने बताए ।
उद्योग पर्यटन वातावरण तथा वन मन्त्री माया भट्टले साविकका क्षेत्रीय वन निर्देशनालयको भवनमा स्थापित गरिएको मन्त्रालय र सामाजिक विकास मन्त्री दीर्घ सोडारीले वडा प्रहरी कार्यालय नजिकै निर्माण भइरहेको साविकको जिल्ला जनस्वास्थ्य कार्यालयमा स्थापना भएको मन्त्रालयमा पदभार ग्रहण गरेका छन् ।
भूमी व्यवस्था कृषि तथा सहकारी मन्त्री विनिता चौधरीले साविकको सहकारी प्रशिक्षण डिभिजन कार्यालयमा स्थापना भएको मन्त्रालयमा पदभार ग्रहण गरेकी छिन् ।
पदभार लगत्तौ अस्पतालको निरीक्षण
पदभार लगत्तै मुख्यमन्त्री त्रिलोचन भट्टले सेती अञ्चल अस्पतालको अनुगमन गरेका छन् । विरामीले उपचारमा सहजता नभएको गुनासो गरेपछि अस्पतालको अवस्था बारे बुझ्न मुख्यमन्त्री भट्ट पदस्थापन लगत्तै सिधै सेती अञ्चल अस्पताल पुगेका हुन् ।
अनुगमनका क्रममा बिरामी, कुरुवा अस्पतालका कार्यरत कर्मचारीसँग स्वास्थ्य सेवा प्रवाहको वारेमा जानकारी समेत लिएका छन् । उनले स्वास्थ्यकर्मीलाई विरामीलाई दुख नहुने गरी स्वास्थ्य सेवा प्रदान गर्न निर्देशन दिए ।