वाम एकतालाई पूर्णता दिन बालुवाटारमा दुई कार्यदलको संयुक्त बैठक
फागुन १०, २०७४ बिहीबार १३:७:०
काठमाडौं : पार्टी एकताका लागि एमाले र माओवादी केन्द्रले गठन गरेका दुईवटा कार्यदलको संयुक्त बैठक प्रधानमन्त्री निवास बालुवाटारमा सुरु भएको छ। दस्तावेज तयार गर्न गठन गरेको विधान मस्यौदा तथा संगठनात्मक कार्यदल र प्रतिवेदन मस्यौदा कार्यदलको संयुक्त बैठक बालुवाटारमा सुरु भएको प्रधानमन्त्री केपी शर्मा ओलीका प्रेस संयोजक चेतन अधिकारीले जानकारी दिए।
फागुन ७ गते एमाले-माओवादीले एकीकृत पार्टी सञ्चालन गर्न दुई छुट्टाछुट्टै कार्यदल गठन गरेका थिए। एकीकृत पार्टीको अन्तरिम राजनीतिक प्रतिवेदन तयार पार्न ९ सदस्यीय समिति गठन भएको थियो। समितिमा माधव नेपाल, भीम रावल, प्रदीप ज्ञवाली, रघुजी पन्त, नारायणकाजी श्रेष्ठ, देव गुरुङ, शक्ति बस्नेत, पम्फा भुसाल र देवेन्द्र पौडेल छन्।
त्यस्तै, अन्तरिम विधान र संगठनात्मक ढाँचा तयार पार्न सात सदस्यीय कार्यदल गठन भएको थियो। कार्यदलमा रामबहादुर थापा, ईश्वर पोखरेल, वर्षमान पुन, सुरेन्द्र पाण्डे, वेदुराम भुसाल, रघुवीर महासेठ र गिरिराजमणि पोखरेल छन्।
प्रतिक्रिया दिनुहोस !
