धरमराउँदै फोरम-राजपा गठबन्धन

 

वीरगन्ज : प्रदेश २ मा सरकारले पूर्णता नपाउँदै संघीय फोरम-राजपा गठबन्धन धरमराउन थालेको छ । संघीय फोरम केन्द्र सरकारमा सहभागी हुन लागेपछि प्रदेशमा राजपासँगको गठबन्धन समस्यामा परेको हो ।

राजपा नेताले फोरम अध्यक्ष उपेन्द्र यादव सरकारमा गए प्रदेश २ मा सरकार छाड्न सक्ने संकेत गरेका छन् । राजपा अध्यक्षमण्डल सदस्य राजेन्द्र महतोले फोरम केन्द्र सरकारमा गए आफूहरूले प्रदेशमा समर्थन फिर्ता लिन सक्ने जनाउ दिएका हुन् ।

‘हामीसँगको पछिल्लो कुराकानीमा उहाँ (उपेन्द्र यादव)ले केन्द्र सरकारमा जाने कुरा गर्नुभएको छैन’, नेता महतोले भने, ‘उहाँ केन्द्र सरकारमा जानुहुन्छ भने हामी पनि सोच्न बाध्य हुन्छौं ।’

फोरम-राजपा गठबन्धनले प्रदेश २ मा ५४ सिटमा जित हासिल गरेको थियो । दुवै दल मिलेर सरकार गठन भइसके पनि विस्तार हुन सकेको छैन ।

राजपा अध्यक्षमण्डलकै सदस्य राजकिशोर यादवले फोरम केन्द्र सरकारमा गए गठबन्धनको औचित्य नरहने बताए । ‘फोरम केन्द्र सरकारमा जान्छ भने गठबन्धनको औचित्य रहनेछैन’, उनले भने, ‘उनीहरू सरकारमा गए भने हामी प्रदेश नम्बर २ मा विचार गर्न बाध्य हुन्छौं ।’

मधेसका लागि कुनै पनि सम्झौता राजपाको उपस्थितिबिना हुन्छ भने मान्य नहुने चेतावनी उनले दिए । ‘संविधान संशोधन हाम्रो बटमलाइन हो । तसर्थ जुनसुकै सम्झौता राजपाको उपस्थितिमा हुनुपर्छ’, उनले भने, ‘अन्यथा पछि हामी आन्दोलन गर्न र गठबन्धनविरुद्ध उत्रिन बाध्य हुन्छौं । हामी पर्ख र हेरको अवस्थामा छौं ।’ यही कारण प्रदेश २ को मन्त्रिपरिषद् विस्तार नगरेको उनले खुलाए । ‘फोरम एकलौटी केन्द्र सरकारमा जान्छ भने त्यसपछि राजपा अर्को निर्णय गर्न बाध्य हुन्छ’, उनले भने ।

राजपा महामन्त्री मनीष सुमनले फोरमसँगको सहकार्यबारे पार्टीमा छलफल भइरहेको जानकारी दिए । ‘फोरम र राजपाबीच सहमति भएरै प्रदेश २ मा सरकार बनेको हो’, उनले भने, ‘फोरम सहमतिविपरीत जान खोजेको संकेत हामीले पनि पाएका छौं ।’

प्रदेश २ मा एक सय सात प्रदेशसभा सदस्य छन् । फोरम-राजपा गठबन्धन सरकारलाई वाम गठबन्धनको पनि समर्थन छ । राजपाले सरकार छाडे पनि वाम गठबन्धनको समर्थन रहने हुँदा फोरमकै नेतृत्वमा प्रदेश सरकार रहने देखिन्छ । राजपा बाहिरिएको अवस्थामा पनि फोरम नेतृत्वको सरकारलाई ६३ प्रदेशसभा सदस्यको समर्थन रहनेछ । सरकार गठनका लागि ५४ प्रदेशसभा सदस्यको समर्थन भए आवश्यक बहुमत पुग्छ ।

कुन दलको कति सिट ?

फोरम २९

राजपा २५

एमाले २१

कांग्रेस १९

माओवादी ११

संघीय समाजवादी १

स्वतन्त्र १