ओलीको 'सरप्राइज' : किन रोजे डा. युवराज खतिवडालाई
काठमाडौं: प्रधानमन्त्री केपी शर्मा ओलीले अर्थविज्ञ तथा नेपाल राष्ट्र बैंकका पूर्वगभर्नर डा. युवराज खतिवडालाई अर्थमन्त्री बनाएपछि नेपाली राजनीति तरङ्गित भएको छ ।
अनुमान भन्दा फरक र विश्वासपात्रलाई पनि पाखा लगाउँदै प्रधानमन्त्री ओलीले खतिवडालाई अर्थमन्त्रालयको जिम्मेवारी दिएर ‘सारप्राइज’ दिएका छना । खतिवडालाई अर्थमन्त्री बनाएपछि नेपाली राजनीतिमा तरङ्मा नै आएको छ। धेरै नेपालमै पहिलो पटक अर्थतन्त्र बुझेको विद्वानले अर्थमन्त्रालयको जिम्मेवारी पाएको भन्दै खुलेर प्रशंसा पनि गरेका छन् ।
एमाले वृत्तमा बोली बन्द
तर खतिवडालाई अर्थमन्त्रालयको जिम्मेवारी दिने ओलीको निर्णयले एमालेवृत्तका धेरै नेता कार्यकर्ताको बोली नै बन्द भएको छ । ओलीले जोखिम मोलेर महासचिव ईश्वर पोखरेल, उपमहासचिव विष्णु पौडेल, सचिव प्रदिप ज्ञवाली र पूर्वअर्थमन्त्री सुरेन्द्र पाण्डे जस्ता नेतालाई पन्छाउँदै डा. खतिवडालाई अर्थमन्त्री बनाएका हुन् ।
डा. खतिवडालाई राज्यमन्त्री बनाएर आफु मन्त्री बन्ने दौडमा रहेका नेताहरुको सपना ओलीको निर्णयले तुषारापात भएको छ । एमाले नेताहरु आफु अर्थमन्त्री बनेर डा. खतिवडालाई राज्यमन्त्री बनाउन चाहन्थे । लबिङ पनि त्यही अनुसार भएको थियो । ओलीका सबैभन्दा नजिकका विश्वासपात्र मानिने महासचिव पोखरेललाई पनि रक्षा मन्त्रालयमा धकेल्दै खतिवडाले अर्थको चाबी पाएका छन् ।
खतिवडाका अगाडि अरु अयोग्य ?
डा. खतिवडालाई अर्थमन्त्री बनाएको असन्तुष्टि एमाले कार्यकर्ताले समाजिक सञ्जालदेखि नेताका घरसम्म पुगेर पोख्न थालेका छन् । महासचिव पोखेरल र खतिवडाको स्टाटस एउटै रहेको टिप्पणी पनि केहीले गरेका छन् । अन्य एमाले नेता कार्यकर्ताले शालिन नेता प्रदीप ज्ञवाली र अर्का युवा नेता योगेश भट्टराई भन्दा खतिवडा योग्य भएको भन्दै व्यंग्य पनि गरेका छन् ।
मन्त्री हुन र राजनीतिक नियुक्तिका लागि झापामै जन्मिनुपर्ने आशयसहितका धारणासमेत एमाले नेता कार्यकर्ताले अभिव्यक्त गरिरहेका छन् । एमाले रोल्पाकी नेतृ ईश्वरी जिएमले ट्विटमा लेखेकी छन्, 'जीवनमा व्यक्तिगत जीवन जिउनै नदिने भो एमालेले क. खतिवडालाई। कहिले गभर्नर, कहिले योजना आयोग । बल्ल फुर्सदिलो भा'को बेला फेरि अर्थमन्त्री । होइन एमालेका अरु नेता कमरेडहरुले पनि खतिवडा कमरेडको जस्तै विषय लिएर पढ्न सुरु गरे बुरु उहाँको जस्तै सबैमा छिटोछिटो पालो आउँथ्यो नि ।'
जिएमको नाम समानुपातिकबाट प्रदेश नम्बर ५ को प्रदेश सभा सदस्यका लागि अन्तिममा काटिएको थियो । पोखराका पत्रकार पुण्य पौडेलले फेसबुकमा छन्ः 'मनमोहन अधिकारी प्रधानमन्त्री हुँदा हरि पाण्डे उद्योग र जलश्रोत मन्त्री बन्नु भएको बेला पहिलोपटक पोखरा आँउदा पार्टीका केही नेताको असन्तुष्टि कार्यकर्ता भेटघाट नराख्नेसम्मका थिए । अहिले डा. युवराज खतिवडा अर्थमन्त्री हुँदाको पार्टी पङ्क्तिबाट आएका रोइलो त्यस्तै लाग्छ । आफ्ना अघिपछि कस्ता अनुयायी छन् हेर्ने फुर्सद निकाले तनाव कम हुन्थ्यो कि?
सांसद एवम् एमाले नेतृ रामकुमारी झाक्रीले अर्थमन्त्रीमा डा. खतिवडालाई नियुक्त गरेर सरकारले आफ्नो प्राथमिकता कसरी निर्धारण गरेको छ भन्ने कुराको राम्रो सन्देश दिएको बताएकी छन् । उनले ट्विटमा पूर्व गभर्नर तथा योजना आयोगका पूर्वउपाध्यक्ष अर्थशास्त्रका जानकार डा. खतिवडालाई अर्थमन्त्री बनाएकोमा प्रधानमन्त्री ओलीलाई धन्यवाद दिएकी छन् ।
जनस्तरमा पनि डा. खतिवडालाई अर्थमन्त्री बनाइएकोमा स्वागत गर्दै प्रधानमन्त्री ओलीलाई धन्यवाद दिइएको छ ।
खतिवडा किन अर्थमन्त्री ?
संगीन घडीमा प्रधानमन्त्री भएका ओलीलाई ठूलाठूला चुनौतीको सामना गर्नुपर्नेछ । मुलुकलाई स्थायी सरकारसहित विकास र समृद्धि बाचाका साथ चुनाव गएका ओलीलाई तीन वाचा पुरा गर्नुपर्ने चुनौती छन् ।
आर्थिक रुपमा जर्जर भएको मुलुकको अर्थतन्त्र सबल बनाउन डा. खतिवडा जस्ता विज्ञको अपरिहार्य आवश्यकता छ । ओलीले पार्टी भित्रका आफ्ना अति विश्वासपात्रलाई पन्छाएर त्यतिकै खतिवडालाई अर्थमन्त्री बनाएका होइनन् ।
उनको विज्ञता तथा नेपाल राष्ट्र बैंक र राष्ट्रिय योजना आयोगको उपाध्यक्ष हुँदा गरेका कामबाट प्रभावित भएका ओलीले पाँच वर्षभित्र २ अंकको आर्थिक वृद्धिदरसहित मुलुकलाई विकसित राष्ट्रको सूचीमा पुर्याउने लक्ष्य लिएका छन् । त्यो लक्ष्यमा पुग्न डा. खतिवडा भन्दा उपयुक्त पात्र ओलीसामू अरु थिएनन् ।
त्यसकारण पनि उनले आफ्ना पार्टीका अन्य नेता र विश्वासपात्रको विकल्पमा अर्थविज्ञ डा. खतिवडालार्इ अर्थमन्त्री बनाएका हुन् । डा. खतिवडाले राष्ट्र बैंकको गर्भनर हुँदा घरजग्गा र सेयरमा गएको कर्जा नियन्त्रण गर्ने काममा उलेख्य भूमिका खेलेका थिए।
प्रतिक्रिया दिनुहोस !
