फोरम सरकारमा जाने भएपछि राजपाले ब्युँत्यायो संविधान संशोधन मुद्दा

काठमाडौँ: एमाले अध्यक्ष केपी शर्मा ओली नेतृत्वको सरकारले संघीय समाजवादी फोरम नेपाललाई सरकारमा ल्याउने कोशिश गरिरहेका बेला अर्को मधेसवादी दल राष्ट्रिय जनता पार्टी नेपालले संविधान संशोधनको मुद्दा फेरि उठाएको छ ।

प्रदेश २ को सरकारलाई वाम दलले समर्थन गरेपछि ओलीले यादव नेतृत्वको फोरमलाई सरकारमा ल्याउने प्रयास जारी राखेका बेला राजपाले संविधान संशोधनको मुद्दा ब्युँताएको हो ।फोरम सरकारमा जाने भएपछि राजपा सरकारप्रति आक्रमक हुन थालेको छ । राजपाले केन्द्रीय सरकार संविधान संशोधनका विषयमा गम्भिर नभएको आरोप लगाएको छ ।

उसले संशोधन लगायतका विषयलाई गौण राखेर अन्यत्र केन्द्रित भएको भन्दै आक्रोश व्यक्त गरेको छ । बुधबार राजपा अध्यक्ष मण्डलका संयोजक महन्थ ठाकुरले प्रेस विज्ञप्ति नै जारी गरी सरकारको कदमको आलोचना गरेका छन् । संयोजक ठाकुरले मधेशी, थारु, जनजाति, आदिवासी, पिछडावर्ग,अल्पसख्यक, मुस्लिम, दलितद्वारा उठाएको माग पुरा हुने गरी संविधान संशोधन , झुठा मुद्दा फिर्ता र बन्दी रहाई लगायतका विषयको अविलम्ब संबोधन गर्न माग गरेका छन् ।

विज्ञप्तिमा मधेशी, थारु, जनजाति, आदिवासी, पिछडावर्ग, अल्पसंख्यक, मुस्लिम, दलितको समस्याप्रति राजपा गम्भिर रहेको बताइएको छ । राजपाले एजेण्डाका आधारमा जनताको अभिमत प्राप्त भएकोले जनादेश अनुरुपले अघि बढ्ने समेत ठाकुरको विज्ञप्तिमा उल्लेख गरिएको छ । फोरम अध्यक्ष उपेन्द्र यादव सरकारमा जाने भएपछि प्रदेश २ मा सत्ता गठबन्धन गरेका फोरम-राजपामा चिसोपन उत्पन्न भएको छ ।