धरानमा खानेपानीको हाहाकार

धरान : सुख्खा मौसमसँगै खानेपानीका मुहान सुक्नथालेपछि धरान उपमहानगरपालीकामा खानेपानीको हाहाकार भएको छ । हप्तादिनदेखि धरानका आधाजसो घरमा जडान गरिएका धारामा पानी नआएपछि खानेपानीको चरम अभाव भएको हो ।

खानेपानी संस्थान धरानले पानी उत्पादक भएको भन्दै खानेपानी वितरणमा भारी कटौती गरेपछी धरानमा खानेपानीको हाहाकार मच्चिएको हो । वर्षा याममा बिहान बेलुका नै खानेपानी वितरण गर्दै आएको संस्थानले महिना दिनदेखि दिन बिराएर मात्रै पानी वितरण गर्न थालेको छ ।

धरानमा दैनिक चार करोड लिटर खानीपानीको माग भएपनी संस्थानले हाल दैनिक एक करोड २० लाख लिटर पानी वितरण गर्दै आएको छ । खानेपानी संस्थानले कम पानी उत्पादन गर्ने गरेका कारण धरानमा वर्षेनी खानेपानीको समस्या भएको धरान –१५ का वडाध्यक्ष नरेशकुमार इवारमले बताए ।

संस्थानले १५ नम्बर वडामा समान रुपले सेवाग्राहीलाई पानी वितरण गर्न नसकेका कारण वडावासी खानेपानी सुविधाबाट बञ्चित हुनु परेको उनको गुनासो छ । घरमा जडान भएका धारामा पानी नआएपछि धरानवासी चारकोसे झाडी र विभिन्न खोला खोल्सीबाट खानेपानीको जोहो गर्न बाध्य भएका छन् ।

घरमा जडान गरिएको धारामा पानी नआएपछि काकाकुलझँै पानी खोज्न चारकोसे झाडी जानु परेको धरान –८ कि ललिता दाहालको गुनाासो छ । उनले दुई दिनमा एक पटक आउने पानीआधा घण्टा नपुग्दै बन्द भएपछी दैनिक जीवन चलाउने समस्या भएको बताइन् ।

खानेपानी संस्थानले समान रुपले पानी वितरण नगरेका कारण हजारौैं परिवार खानेपानी सुविधाबाट वञ्चित भएको विजयपुर हस्पिटलका अध्यक्ष पंकज खतिवडाले बताए । उनले संस्थानले प्रर्याप्त पानी वितरण नगरेका कारण दैनिक दश हजार लिटर पानी किनेर हस्पिटल संचालनगर्नु परेको बताए ।

धरानका १, २, ८, ९, १०, ११, १२, १४, १५, १९ लगायतका वडामा प्रर्याप्त खाने पानी वितरण नगरिएका कारण धरान बासी खानेपानी सुविधाबाट बञ्चित भएका हुन् । संस्थानले प्रयाप्त खानेपानी वितरण नगरेपछी सर्वसाधारणले घण्टा लगाएर बम धारा, खत्रीधारा, विष्णुपादुका, चारकोसि झाडि लगायतका स्थानवाट पानी ल्याएर जिविका चलाउनु परेको बताए । धारामापानी नआएपछि संस्थानको कार्यालयमा पटक पटक डेलिगेशनजादा समेत संस्थानले पानी वितरण नगरेको स्थानियको आरोप छ ।

खानेपानी संस्थान धरानका प्रमुख रामकुमार श्रेष्ठले सुख्खा मौसमसँगै खानेपानीको मुल सुक्न थालेपछि उपभोक्ताको माग बमोजिम खानेपानी वितरण गर्न नसकेको स्विकार गरे । भौगोलिक विकटताका कारण धरानका कतिपय वडामा समान रुपले पानी वितरण गर्न नसकिएको उनको भनाइ छ ।

धरानमा १९ हजार २ सय धारा मार्फत स्थानियलाई खानेपानीवितरण गरिँदै छ । संस्थानले दैनिक एक करोड ३० लाख खानेपानी उत्पादन गर्ने गरेको प्रमुख श्रेष्ठले बताए ।