होलीको खुशीमा मदिरा पिएर बाइक चलाउँदा दुर्घटना : चालकको मृत्यु
जनकपुरधाम : होलीको उत्सवमा अत्याधिक मदिरा पिएर मोटरसाइकल चलाउँदा दुर्घटनामा परी जनकपुरमा एकजनाको मृत्यु भएको छ । मदिरा पिएर तिव्र गतिमा मोटरसाइकल चलाउने क्रममा विपरित दिसातर्फबाट आउँदै गरेको गाडीमा ठोक्किएर पूर्व पश्चिम राजमार्ग अन्तर्गत जनकपुरको मुजेलियामा युवकको घटनास्थलमै मृत्यु भएको हो ।
उनीसँगै रहेका अर्का एक युवक गम्भीर घाइते छन् । मृतकको पहिचान खुल्न सकेको छैन । प्रहरीका अनुसार अन्दाजी २० वर्षीय युवकको मृत्यु भएको हो । घाइते युवक पनि सोही उमेर समूहको भएको धनुषाका प्रहरी नायब उपरीक्षक प्रविण धितालले जानकारी दिए । घाइतेको अञ्चल अस्पतालमा उपचार हुँदै छ ।
अन्य जिल्लामा शुक्रबार होली मनाइए पनि जनकपुरमा शनिबार होली मनाइएको हो । मिथिला मध्यमा परिक्रमा शुक्रबार सम्पन्न भएको हुनाले जनकपुरमा शनिबार होली मनाइएको हो । होली मनाउने नाममा युवाले अत्याधिक मदिरा सेवन गरेर तिव्र गतिमा सवारी साधन चलाउने गरेका छन् । प्रहरीले निगरानी गरेपनि युवाहरुको समूहले अटेरी गर्दै आएको छ ।
प्रतिक्रिया दिनुहोस !
