काठमाडौं : कमलपोखरीस्थित सिटी सेन्टरमा कार्यरत सेक्युरिटी गार्ड रवीन खवास भुजेलको हत्यामा संलग्नलाई प्रहरीले पक्राउ गरेको छ।
दोलखाको मेलुङग गाउँपालिका वडा नम्बर ३ हाडी गाउँ (साविक पवटी गाविस वडा नम्बर ३) बस्ने रुद्रबहादुर बस्नेतलाई शुक्रबार काठमाडौं प्रहरी परिसरले पक्राउ गरेको हो। मृतक रवीन खवास शुक्रबार बिहान ३ः२० बजे सिटी सेन्टर भवनको भुइँतलामा खसेको अवस्थामा भेटिएका थिए।
रुद्र बस्नेत र मृतक रवीनले शुक्रबार राति मादक पदार्थ सेवन गरेका थिए। नसामा रहेका दुईबीच सामान्य विवाद भएको र रवीनको मुख र नाक जबरजस्ती थिची मारेपछि सिटीसेन्टरको चौथो तल्लाबाट खसालेको बस्नेतले स्वीकार गरेको प्रहरीले जनाएको छ।
महानगरीय प्रहरी वृत्त कमलपोखरीबाट खटिएको टोलीले घटनाको अनुसन्धान सुरु गरेको थियो। मृतक रवीन र बस्नेत सिटी सेन्टरको बिग मूभिजमा ग्रुप फर कम्पनीमार्फत सेक्युरिटी गार्डका रुपमा कार्यरत थिए।
कर्तव्य ज्याद मुद्दामा बस्नेतलाई म्याद थप गरी अनुसन्धान थालिएको छ।
प्रतिक्रिया दिनुहोस !
