मोटरसाइकल आपसमा ठोक्किँदा एकको मृत्यु
भक्तपुर : भक्तपुर काठमाडौं ६ लेन सडक अन्तर्गत भक्तपुर नगरपालिका –१ सुवर्ण चोकमा शनिबार राती दुई मोटरसाइकल एकआपसमा ठोक्किँदा एकको ज्यान गएको छ ।
सल्लाघारीबाट ६ लेन सडक हुँदै सूर्यविनायकतर्फ जाँदै गरेका बा ६१ प ४१५ नम्बरको सुजुकी मोटरसाइकल र बा ९२ प ४६४ नम्बरको डुक मोटरसाइकल एकापसमा ठोक्किँदा डुकमा सवार युवकको ज्यान गएको हो ।
महानगरीय प्रहरी परिसर भक्तपुरका अनुसार डुक मोटरसाइकलका चालक भक्तपुर नपा –५ घर भइ हाल सूर्यविनायक नपा –८ बस्दै आएका २४ वर्षीय प्रमोद श्रेष्ठको घटनास्थलमै ज्यान गएको हो ।
घटनालगत्तै उपचारकालागि भक्तपुर अस्पताल पुर्याइएका श्रेष्ठलाई चिकित्सकले मृत घोषणा गरेका थिए । एउटै दिशामा गइरहेका दुई मोटरसाइकल ठोक्किएर भएको घटनालगत्तै भागेका सुजुकी मोटरसाइकलका चालकलाई भने प्रहरीले नियन्त्रणमा लिन सफल भएको छ । काभ्रे जिल्लाको नमोबुद्ध बस्ने २६ वर्षीय कुलबहादुर खनाललाई नियन्त्रणमा लिएको हो ।
महानगरीय प्रहरी परिसर भक्तपुरका प्रवक्ता प्रहरी नायब उपरीक्षक कृष्ण प्रसाईले घटनामा संलग्न मोटरसाइकलका चालक र दुइटै मोटरसाइकल महानगरीय प्रहरी वृत्त जगातीको नियन्त्रणमा राखिएको जानकारी दिए । घटनाबारे थप अनुसन्धान भइरहेको प्रहरीको भनाइ छ ।
प्रतिक्रिया दिनुहोस !
