प्रशासकीय अधिकृत मातेर कार्यालय आएपछि
तुलसीपुर : राप्ती गाउँपालिकाका प्रमुख प्रशासकीय अधिकृत ललितकुमार थापा मदिरा पिएर कार्यालय प्रवेश गरि अन्य कर्मचारीलाई अभद्र व्यवहार गरेका छन् । आइतबार बिहान साढे ११ बजे कार्यालय छिरेका थापाले मदिराकै तालमा कार्यकक्षमै गएर लेखापाललाई तथानाम गाली गरे । नजिक भएका अन्य कर्मचारीलाई पनि अभद्र व्यवहार गरेको प्रत्यक्षदर्शी सेवाग्राहीले बताए ।
मदिराले मातेर प्रमुख थापा कार्यालय आएको र काम गरिरहेको अवस्थामा विभिन्न बहाना निकाल्दै अभद्र व्यवहार गरेको राप्ती गाउँपालिकाका लेखापाल धर्म वलीले बताए । ‘म काम गर्दै थिएँ, एकाएक प्रमुख थापाले तथानाम गाली गर्दै कुटपिट प्रयास समेत गर्नुभयो’ वलीले भने । ‘म संयमित भएर बसिरहेँ । सव इन्जिनियरले कुटपिट हुनबाट बचाउनु भयो ।’ वलीले आइतबार पनि हातपात प्रयास गरेको बताइएको छ ।
उता अधिकृत थापाले सामान्य विवाद भएको स्वीकारेका छन् । उनले लेखापालले दुई महिनादेखिको आफ्नो टिएडिए र चार महिना देखिको घरभाडा समेत नदिएकाले किन ढिलो भयो भनेर सोधपुछ गर्दा सामान्य विवाद भएको बताए । यसलाई सामान्य रुपमा लिनु पर्ने उनको भनाइ छ ।
राप्ती गाउँपालिकाका प्रमुख नुमानन्द सुवेदीले त्यो विषयमा सबै आफूलाई जानकारी नभएको भन्दै सोमबार यो विषयमा छलफल गर्ने बताए । म आइतबार जिल्ला प्रशासन कार्यालयमा गएकाले यो विषयमा सबै पूर्णरुपले बुझ्न नसकेको भन्दै समान्य विवाद भएको सुनेको बताए ।
उनले सोमबार कर्मचारी बीच छलफल गरेर सत्य तथ्य बुझ्ने बताए । लेखापाल र प्रमुख प्रशासकीय अधिकृत बीचको विवादका कारण दिनभर गाउँपालिकाको सेवा प्रवाहमा समेत समस्या भएको थियो ।
प्रतिक्रिया दिनुहोस !
