काठमाडौं : आईसीसी विश्वकप क्रिकेट छनोट खेलमा नेपाल ११६ रनले पराजित भएको छ । जिम्बाब्वेले दिएको लिएको ३८१ रनको लक्ष्य पछ्याइरहेको नेपालले ६ विकेटको क्षतिमा पूरै ओभर खेल्दै २६४ रनमात्र बनायो । टेस्ट र वान डेमा अनुभवी जिम्बाब्वेलाई नेपालले ६ विकेटको क्षतिमा ३८० रनमा रोकेको थियो ।
नेपालको पालिमा शरद भेषावकरले सर्वाधिक ५२ रन बनाए । ४८ बलको सामना गरेका उनले ६ चौका र एक छक्का प्रहार गरे । यसैगरी आरिफ शेखले ५० रनको अर्धशतकीय पालि खेले । कप्तान पारस खड्काले ४० रनको योगदान दिए । आक्रामक खेल खेलेका पारसले आठ चौका हिर्काए । यसैगरी निकै सुस्त खेलेका उपकप्तान ज्ञानेन्द्र मल्लले ३२ रन बनाए । उनले ५९ बलका तीन चौका हिर्काए । नेपालका प्रारम्भिक ब्याट्सम्यान दिलीप नाथ दुई रनमा पेभेलियन फकिँदा दीपेन्द्रसिंह ऐरीले २३ रन बनाए । यसैगरी रोहितकुमार पौडेलले ३०, सोमपाल कामीले अविजित १२, बसन्त रेग्मीले दुई तथा सन्दीप लामिछानेले अविजित सात रन बनाए ।
बुलावायोको क्विन्स स्पोर्टस् क्लबमा टस जितेर पहिले ब्याटिङ गरेको जिम्बावेले निर्धारित ५० ओभरमा ६ विकेट गुमाएर तीन सय ८० रन बनाएको थियो। जिम्बावेको पालिमा सिकन्दर राजा र ब्रेन्डन टेलरले शतक बनाए । राजाले एक सय २३ रन बनाए भने टेलरले एक सय रनको योगदान दिए । राजाले ६६ बलमा नौ छक्का र सात चौका प्रहार गरे । टेलरले ९१ बलमा सात चौका र एक छक्का प्रहार गरे । यस्तै सोलोमन मिरले ५२ रनको अर्धशतकीय पालि खेले।
नेपालका कुनै पनि खेलाडीले उत्कृष्ट बलिङ गर्न सकेनन् । बसन्त रेग्मी र सोमपाल कामीले दुईदुई विकेट लिए पनि निकै रन दिए । आठ ओभर बलिङ गरेका सोमपालले ८२ तथा १० ओभर बलिङ गरेका बसन्तले ६९ रन दिए । सन्दीप लामिछाने र ललितनारायण राजवंशीले एकएक विकेट लिए ।
नेपालले आगामी बिहीबार स्कटल्यान्डसँग प्रतिस्पर्धा गर्नेछ । विश्वकप छनोटमा नेपाल समूह ‘बी’मा छ । नेपालको समूहमा नेपालसँगै जिम्बावे, स्कटल्यान्ड, अफगानिस्तान र हङकङ छन् ।
प्रतिक्रिया दिनुहोस !
