काठमाडौँः इङ्लिस क्लब आर्सनल लगातार तीन खेलमा पराजित भएपछि म्यानेजर आर्सेन वेंगरमाथि क्लब छाड्न दबाब बढेको छ ।
आइतवार राति भएको इङ्लिस प्रिमियर लिगको खेलमा कम्जोर प्रतिस्पर्धी ब्राइटनसँग पनि पराजित आर्सनल यो सिजन च्याम्पियन्स लिगमा छनोट हुने सम्भावना पनि कम्जोर बन्दै गएको छ ।
आजको ब्राइटनसँग पराजित भएपछि उपाधिको पहिलो नम्बरमा रहेको म्यानचेस्टर सिटीसँग आर्सनल ३० अंकले पछि परेको छ भने च्याम्पियन्स लिग छनोटका लागि पनि ऊ १३ अंकले पछि परेको छ ।
ब्राइटनलाई सनसनीपूर्ण जित दिलाउन डन्कले सातौँ मिनेटमा र मुर्रेले खेलको २६ औँ मिनेटमा गोल गरे । पराजित आर्सनलका लागि खेलको ४३ औँ मिनेटमा पिएर्रे एमेरिक एयुबामेयाङले गरे ।
आर्सनल यसअघि काराबाओ कपको फाइनलमा म्यानचेस्टर सिटीसँग ३–० ले पराजित भएको थियो । त्यसपछि सिटीसँग नै प्रिमियर लिगमा पनि ३–० ले पराजित भयो । आइतवार ब्राइटनविरुद्धको खेलमा पनि पराजित भएपछि आर्सनलको पराजय यात्रा तीन खेलमा पुगेको छ ।
यो पराजयपछि आर्सलन २९ खेलबाट ४५ अंकसहित लिगको छैटौँ स्थानमा छ भने विजयी भएको ब्राइटन २९ खेलबाटै ३४ अंकसहित लिगको दशौँ स्थानमा छ ।
प्रतिक्रिया दिनुहोस !
