काठमाडौँ: राष्ट्रिय जनता पार्टी नेपालका नेता तथा प्रतिनिधि सभाका सांसद् महतोले कैलाली क्षेत्र नम्बर १ बाट विजयी रेशम चौधरीलाई संसदमा आउने वातावरण बनाइदिन सरकारसँग माग गरेका छन् ।
मंगलबार दिउँसो बसेको प्रतिनिधि सभाको बैठकमा सम्बोधन गर्दै राजपा नेता महतोले अपर जनमतबाट निर्वाचित चौधरीलाई स-सम्मान संसदमा ल्याउन वातावरण बनाइदिन आग्रह गरे । ‘अत्यधिक जनमत पाएर तपाईहरु सरकारमा हुन्नुहुन्छ', उनले भने, 'उता जनताले नै अपार जनमत दिएर जिताएका चौधरी जेलमा छन् ।’
उनले चौधरीको अपराध प्रमाणित नभएको पनि जिकिर गरे । 'अरोप लाग्दैमा कोही अपराधी हुँदैन, उनको अपराध प्रमाणित भएको छैन', महतोले भने, 'त्यसकारण चौधरीलाई संसद्मा आउन आवश्यक सहयोग गरिदिनुस ।’
महतोले प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाललाई जनताको अत्यधिक समर्थन पाएकोमा बधाई दिँदै दिल पनि ठूलो बनाउन आग्रह गरे । ‘जनताले तपाईँहरुलाई ठूलो बनाए, अब तपाईँहरुले दिल पनि ठूलो बनाउनुहोस’, उनले भने ।
महतोले दिल ठूलो बनाएर देशलाई विकास र समृद्धिको दिशामा अगाडि बढाउन आग्रह गरे । उनले जनताले दिएको समर्थनलाई जिम्मेवारीपूवर्क निर्वाह गर्न प्रधानमन्त्री ओली र माओवादी अध्यक्ष दाहाललाई आग्रह गरे।
महतोले सिंहदबार र काठमाडौंले सबैलाई आफ्नो सम्झनुपर्ने बताए । ‘मधेसमा बस्नेको नेपालको उतिकै माया छ', उनले भने, 'जति पहाडमा बस्नेको जति माया छ ।’
‘गोरखा र सिन्धुपाल्चोकमा भूकम्प जाँदा हामीलाई पनि पीडा हुन्छ', उनले थपे, 'सर्लाही र सिरहामा आगलागी हुदाँ काठमाडौंमा पीडा हुनुपर्यो ।’
उनले प्रधानमन्त्री ओलीलाई अगाडि बढ्न आह्वान गर्दै सहयोग गर्ने प्रतिबद्धता व्यक्त गरे । 'विगतमा जस्तो धोका नहोस, काम गर्नुहोस, तपाई अगाडि बढ्नुहोस हामी सहयोग गर्न तयार छौँ,’ महतोले भने ।
उनले विरोधका लागि विरोध नगर्ने प्रतिबद्धता समेत जनाए । उनले लडाईँ झगडा बन्द गरे २० वर्षसम्म विकासको गतिविधिमा लाग्न समेत आह्वान गरेका छन् ।
प्रतिक्रिया दिनुहोस !
