कोलम्बो: श्रीलंकामा बौद्ध र मुस्लिम समुदायबीच हिंश्रक घटना बढेपछि त्यहाँको सरकारले मंगलवार देशभरमा १० दिनका लागि संकटकाल लगाएको छ ।सरकारले चिन्ताजनक नरहे पनि अवस्थालाई नियन्त्रणबाहिर जान नदिन यो कदम उठाउनुपरेको जनाएको छ ।
श्रीलंकन मिडियाका अनुसार क्यान्डी शहरमा अवस्था सबैभन्दा खराब छ । यहाँ दुई दिनअघि मुस्लिम र बौद्ध समुदायका मानिसबीच झडप भएको थियो । झडपमा बौद्ध धर्मका एक व्यक्तिको ज्यान नै गयो । यस क्रममा मुस्लिम समुदायका व्यापारीको दोकानमा आगो पनि लगाइएको छ । स्थानीय प्रशासनले यस हिंसापछि शहर र आसपासका इलाकामा कर्फ्यू लगाइदिएको छ।
हिंसाको कारण के हो ?
श्रीलंकाका कयौँ इलाकमा मुस्लिम र बौद्धबीच सम्बन्ध सामान्य छैन। बौद्ध समुदायले मुस्लिम संस्था र यी सँग जोडिएका मानिस जबरजस्ती धर्म परिवर्तनमा लागेको आरोप लगाएका छन् । उता केही संगठन र समूह रोहिङ्ग्या मुसलमानलाई शरण दिएकोमा पनि विरोधमा उत्रेका छन् । बौद्ध सिंहलीहरुले रोहिङ्ग्या मुस्लिमोले म्यान्मारमा आफ्ना समुदायका मानिसमाथि ज्यादति गरेको आरोप लगाएका छन् ।
श्रीलंकामा मुस्लिमको जनसंख्या केबल १० प्रतिशत मात्रै रहेको छ भने बौद्ध सिंहाली करिब ७५ प्रतिशत रहेका छन् ।
सरकारले कस्तो कदम चाल्यो ?
सरकारका आधिकारिक प्रवक्ता दयासिरी जयसेकराका अनुसार देशभरमा फैलिएको हिंसालाई मनन गर्दै मंगलवार मन्त्रिपरिषदको बैठक बसेको थियो । यो बैठकले देशभर नै संकटकाल लगाउने निर्णय गरेको छ। साम्प्रदायिक दंगालाई रोक्नका लागि यो कदम चालिएको हो ।
उनले सरकार अहिले फेसबुक र अन्य सामाजिक सञ्जालमाथि पनि निगरानी भइरहेको बताएका छन् । हिंसा फैल्याउन सामाजिक सञ्जाल प्रयोग गर्नेहरुलाई पनि नियन्त्रणमा लिँदै कारबाही चलाइएको उनले बताएका छन् ।
प्रतिक्रिया दिनुहोस !
