दुनै बजार बुधबारदेखि खुल्ने
डोल्पा : सात दिनदेखि बन्द रहेको डोल्पाको सदरमुकाम दुनै बजार बुधबार खुल्ने भएको छ । जिल्ला प्रशासन कार्यालय डोल्पाको सक्रियतामा एक सातादेखिको बन्द बुधबारदेखि खुल्ने सहमति भएको प्रमुख जिल्ला अधिकारी भुपेन्द्र थापाले बताए ।
उनका अनुसार बन्द बजार खोल्ने र यातायात सुचारु गर्ने दुई निर्णयसहित बन्दकर्तासँग सहमति भएको बताइएको छ । ठुलीभेरी नगरपालिकाको केन्द्र जुफालमा सारेको विषयमा एकसातादेखि सदरमुकाम दुनैमा आन्दोलन जारी रहेको छ । बन्दका कारण जनजीवन प्रभावित भएको भन्दै जिल्ला प्रशासनले बन्दकर्तासँग छलफल गरि जनजीवन सहज बनाउन बन्दका कार्यक्रम फिर्ता लिएको प्रमुख जिल्ला अधिकारी भुपेन्द्र थापाले बताए ।
बन्दको कार्यक्रम फिर्ता गरिएको भए पनि आन्दोलनका चरण भने निरन्तर भइरहने संघर्ष समितिका अध्यक्ष हिक्मत शाहीले जानकारी दिए । उनका अनुसार सरकारको निर्णय अनुसार एउटा निष्कर्ष नआउन्जेल आन्दोलन चलिरहने छ ।
प्रतिक्रिया दिनुहोस !
