प्रहरीमाथि आक्रमण गर्ने दुई पक्राउ
विराटनगर : ड्युटीमा रहेका प्रहरीलाई आक्रमण गर्ने दुई युवालाई प्रहरीले मंगलबार पक्राउ गरेको छ । विराटनगर –१७ का २५ वर्षीय सोनु आलम र अफजन आलमलाई पक्राउ गरिएको इलाका प्रहरी कार्यालय रानीका प्रहरी निरीक्षक सन्तोष निरौलाले बताए ।
उनीहरुले लागूऔषध नियन्त्रण व्यूरोमा कार्यरत प्रहरी जवान अनिरुद्र ताजपुरिया र कैलाश खत्रीलाई कुटपिट गरेको प्रहरीको भनाइ छ । प्रहरीहरु घाइते भएका छन् ।
प्रहरी विट अगाडि पार्किङ गर्न खोजिएको मोटरसाइकल त्यहाँ पार्किङ नगर्न आग्रह गर्दा दुबैले प्रहरीमाथि आक्रमण गरेको निरौलाको भनाइ छ । विराटनगर –१६ स्थित सीमा प्रहरी चौकी नजिकै प्रहरीमाथि आक्रमण भएको हो । निरौलाका अनुसार प्रहरी जवानहरुमाथि हेल्मेट प्रहार गरिएको थियो ।
हेल्मेटले लागेर ताजपुरियाको टाउको फुटेपछि उपचारका लागि विराट नर्सिङ होममा भर्ना गरिएको छ । पक्राउ परेका दुबैजना विरुद्ध प्रहरीले सार्वजनिक अपराध ऐन अन्तर्गत मुद्धा चलाउने तयारी गरिरहेको छ ।
प्रतिक्रिया दिनुहोस !
