बिपी राजमार्ग अतिक्रमण गरी बनाइएका संरचना हटाउन निर्देशन

सिन्धुली : धुलिखेल–सिन्धुली–बर्दीवास बिपी राजमार्ग मिचेर दायाँ बायाँ बनेका भौतिक संरचना हटाउन सडक विभागले निर्देशन दिएको छ । सडकको दायाँ बायाँ १५-१५ मिटर क्षेत्रभित्र सडक मिचेर निर्माण गरिएका सबै भौतिक संरचना हटाउन विभागले निर्देशन दिएको हो । एक महिनासम्म नहटाए भत्काउने चेतावनी समेत विभागले दिएको छ ।

सडक आयोजनाको बुधबार सिन्धुलीमाढीमा बसेको सर्वदलीय बैठकले सडकको लागि १५-१५ मिटर र दायाँ बायाँ ६-६ मिटर नगरपालिकाको सेट व्याकको लागि गरी जम्मा २१-२१ मिटर गरी दायाँ बायाँ जम्मा ४२ मिटर भित्र निर्माण गरिएको सार्वजनीक भवन, पसल, निजी आवस, सहायक सडक, होटललगायतका संरचना खाली गर्न एक महिने अल्टिमेटम दिएको हो ।

सडक अतिक्रमण गरी कुनै पनि कार्य नगर्न र अतिक्रमण गरी निर्माण गरिएका सबै प्रकारका संरचना हटाउन सडक विभागको निर्देशन अनुसार निर्णय गरी एक महिनाको अल्टिमेटम दिइएको बिपी राजमार्ग आयोजनाका निमिक्त आयोजना प्रमुख राकेश महर्जनको भनाइ छ ।

‘बुधबार सिन्धुलीमाढीमा भएको निर्णय अनुसार आयोजनाले तत्काल सार्वजनीक सूचना जारी गरी भौतिक संरचना निर्माण गरी सडक अतिक्रमण गर्नेहरु स्वयमलाई एक महिना भित्र खालीगर्न आग्रह गर्ने र अटेर गरे आयोजनाले बलप्रयोग गरेरै भएपनि खाली गराउने निर्णय भएको छ,’ उनले भने ।