काठमाडौं: नेकपा माओवादी केन्द्रका अध्यक्ष पुष्पकमल दाहाल प्रचण्ड बिहीबार साँझ शाह वंशीय राजाहरूले शासन गर्ने नारायणहिटी दरबार परिसरमा पुगेका छन् ।
त्यहाँ उनी निर्माणाधीन गणतन्त्र स्मारकको अवलोकन गर्न पुगेका हुन् । गणतान्त्रिक नेपालको स्थापनाका लागि सहादत प्राप्त गरेका, बेपत्ता नागरिक र अपांगता भएकाहरूको सम्मानमा स्थापित गणतन्त्र स्मारकको प्रचण्डले अवलोकन गरेका छन् ।
प्रचण्डले उक्त स्मारकको ऐतिहासिक महत्व भएको पनि बताए । यो स्मारक देश तथा विदेशका पर्यटकलाई नेपाली जनताको संघर्षको स्मरण गराउने गरी तयार गर्नुपर्ने पनि उनले बताए ।
'यो स्मारक मेरा लागि झनै महत्वपूर्ण छ', उनले भने, 'यसले नेपाली जनताको महान संघर्षको इतिहास चित्रण गर्दछ । हामीले हाम्रो बलिदानीपूर्ण इतिहास झल्काउने गरी यसलाई अन्तिम रूप दिनु पर्छ ।'
प्रतिक्रिया दिनुहोस !
