अस्पतालमा अग्नि नियन्त्रण प्रशिक्षण

स्याङ्जा : जिल्ला अस्पताल स्याङ्जा परिसरमा दिउँसो अचानक आगलागी भयो । अग्नि नियन्त्रक सुनिता भारद्धाजले हतारहतार अस्पतालभित्र भित्तामा अड्याएर राखेको अग्नि नियन्त्रण सिलिन्डर झिकेर ल्याइन् अनि त्यसभित्रको सुक्खा (ड्राई) पाउडर आगलागी भएको ठाउँमा फ्याकिन् । एकछिन त आगो झन बल्यो । त्यसपछि अर्को साथीले अर्को सिलिन्डर झिकेर ल्याइन् अनि त्यसैगरी बलेको आगोमा सिलिन्डरभित्रको पाउडरलाई आगोमा फ्याँकिन् । आगो कम हुँदै गयो । अन्नत ः दनदनी बलेको आगो निभ्यो ।

यसरी अचानक आगलागी भएमा प्राथमिक उपचारका लागि कसरी जुट्ने भनेर अग्नि नियन्त्रक भारद्धाजले अस्पतालका कर्मचारीलाई व्यावहारिक एवं सैद्धान्तिक प्रशिक्षण दिएकी हुन् । जिल्ला अस्पताल स्याङ्जाले आगलागी भएमा कसरी नियन्त्रण गर्ने भनेर अस्पतालका कर्मचारीलाई प्रशिक्षण दिएको हो । प्रायः अस्पतालका भित्तामा अड्याएर राखिने अग्नि नियन्त्रण सिलिन्डरको उपयोग कसरी र कहिले हुने भन्ने जानकारी हुँदैन । सिलिन्डरको प्रयोग कसले र कसरी गर्छ यी आममानिसको जिज्ञासाभित्र पर्छन् । तर, प्रशिक्षणपछि धेरैले यसबारे जानकारी पाए ।

वषौंदेखि आफ्नै कार्यालयको भित्तामा अड्याइएको सिलिन्डर देखाउँदै कार्यालय सहयोगीले आफूलाई त्यसको प्रयोगबारे जिज्ञासा राखेपछि अस्पताल प्रमुख डा. पोखरेलले अस्पतालका सबै कर्मचारीलाई अग्नि नियन्त्रणसम्बन्धी प्रशिक्षण आवश्यकताको महसुस गरेको बताए । प्रशिक्षणमा काठमाडौंबाट अग्नि नियन्त्रक पनि झिकाइएको थियो । अग्नि नियन्त्रक सुनिता भारद्धाजले सैद्धान्तिक एवं व्यावहारिक दुवै किसिमबाट सहभागीलाई प्रशिक्षण दिएकी थिइन् ।

कुनै पनि भवनमा अचानक आगलागी भए दमकल वा अग्नि नियन्त्रक घटनास्थल नपुगुन्जेलसम्म यस्ता सिलिन्डर उपयोग गर्न सकिने भारद्धाजले जानकारी दिएकी थिइन् । प्रशिक्षण निकै लाभदायी भएको अस्पतालले जनाएको छ । अग्नि नियन्त्रण सिलिन्डर भित्तामा टाँसेर राखेको वर्षौं भए पनि यस्तो प्रशिक्षण पहिलो पटक पाएको बताउँछिन् सिनियर नर्स मिठु रानाभाट ।

महिला अग्नि नियन्त्रक सुनिता भारद्धाजले कर्मचारीलाई व्यावहारिक कक्षा सञ्चालन गरेर अग्नि नियन्त्रणसम्बन्धी अभ्यास गराउन पाएकोमा खुसी व्यक्त गरिन् । अग्नि नियन्त्रणसम्बन्धी प्रशिक्षणपछि जिल्ला अस्पताल स्याङ्जाले अग्नि सुरक्षा अधिकारी र अग्नि वार्डेनसमेत तोकेर जिम्मेवारी दिइसकेको अस्पताल प्रमुख एवं डा. अमृत पोखरेलले जानकारी दिए ।