एन्फाद्वारा स्ट्राइकर अनु सम्मानित

काठमाडौं : अखिल नेपाल फुटबल संघ (एन्फा)ले अन्तर्राष्ट्रिय नारी दिवसलाई बुधबार ‘महिला फुटबल दिवस’को रूपमा मनाएको छ । एसियाली फुटबल महासंघ (एएफसी)ले हरेक वर्ष मार्च ८ को दिनलाई एएफसी महिला फुटबल दिवसका रूपमा मनाउँदै आएको छ । यस वर्ष एएफसीमा आबद्ध विभिन्न ३० देशमा फुटबल खेलसम्बन्धी फेस्टिवल, प्रतियोगिता, वर्कसप, सेमिनार र स्किल क्लिनिक लगायतका कार्यक्रम गरी महिला फुटबल दिवस मनाइएको एएफसीले जनाएको छ ।

यस वर्षको कार्यक्रममा २३ हजार महिलाले प्रत्यक्ष सहभागिता जनाएका छन् । यसैगरी एन्फाले पनि सातदोबाटोस्थित एन्फा मुख्यालयमा विभिन्न स्कुलका छात्रा र राष्ट्रिय महिला टोलीबीच २० मिनेटको मैत्रीपूर्ण फुटबल खेल आयोजना गरेको थियो । सोही अवसरमा एन्फा अन्तर्गतको महिला समितिले नेपाली राष्ट्रिय महिला टोलीकी कीर्तिमानी स्ट्राइकर अनु लामालाई २५ हजार रुपैयाँ र सम्मानपत्रबाट सम्मान गरेको छ ।

अनुको नाममा अन्तर्राष्ट्रिय ३५ गोलको कीर्तिमान छ । अनुलाई कार्यक्रमकी प्रमुख अतिथि एवं प्रदेश नम्बर ३ की उपसभामुख राधिका तामाङले सम्मान गरिन् । कार्यक्रममा एन्फाका पदाधिकारी, प्रशिक्षक, खेलाडी लगायतको उल्लेख्य उपस्थिति थियो ।