विमानस्थलबाट सुन तस्करी गर्न खोज्ने तीनजना पक्राउ

काठमाडौं: वैदेशिक रोजगारीको सिलसिलामा सुन तस्करी गर्न खोज्ने तीनजनालाई प्रहरीले पक्राउ गरेको छ । बिहीबार अपरान्ह सिनामंगल बस स्टपबाट मरुटोल बस्ने दिलिप शाहीलाई तीनवटा सुनको बालासहित नियन्त्रणमा लिएपछि थप रहस्य खुलेको हो ।

महानगरीय प्रहरी वृत्त गौशालाले शाहीलाई नियन्त्रणमा लिएपछि सोधपुछ गर्दा उक्त सुन ललितपुर बुंमतिकी सुनिता खड्गीको रहेको रहस्य खुलेको थियो । कतारबाट तस्करी गरि त्रिभुवन अन्तराष्ट्रिय विमानस्थल हुँदै भन्सारको चेकिङ पार गरी विमानस्थल बाहिर भारत मोतिहारीका मोहम्मद सहिवले खड्गीलाई दिएका थिए ।

वृत्तका अनुसार खड्गीले सुन शाहीलाई दिएकी थिइन् । प्रहरीले तीनैजनालाई पक्राउ गरी बरामद सुन (१३.५६ तोला)सहित कारबाहीको लागि राजश्व अनुसन्धान विभाग हरिहरभवन बुझाएको जानकारी महानगरीय प्रहरी परिसर टेकुका प्रमुख एसएसपी विश्वराज पोखरेलले दिए ।

बरामद सुनको नेपाली मूल्य सात लाख ८२ हजार नौ सय ६२ रुपैयाँ हुन आउँछ । पोखरेलका अनुसार विदेशमा बसेर सुन तस्करी गर्ने व्यक्तिले नेपाल फर्कने कामदारलाई पैसाको लोभ देखाएर विल बनाई सुन पठाउँदै आएका थिए ।

भरियाहरुले सुनको बाला ल्याएबापत ६ हजार पाउँदै आएको प्रहरी अनुसन्धानबाट खुलेको छ । एसएसपी पोखरेलका अनुसार डंगोलकी पति कतारमा बसेर अवैध ढंगबाट नेपालमा सुन तस्करी गर्दै आएको र हालसम्म १३ पटक सुनका बाला नेपालमा तस्करी गर्दै आएको अनुसन्धानबाट देखिएको छ ।