‘कर्मचारीको सहयोग नभए काम गर्नै सकिन्न’
हेटौंडाः तीन नम्बर प्रदेशका मुख्यमन्त्री डोरमणि पौडेलले कर्मचारीले सहयोग नगरे प्रदेश सरकारले काम गर्न नसक्ने बताएका छन् ।
स्थानीय तह कर्मचारी मिलन केन्द्र नेपालको शुक्रबार हेटौँडामा भएको राष्ट्रिय भेलाको उद्घाटन गर्दै मुख्यमन्त्री पौडेलले आफुले कर्मचारीसँग पूर्ण सहयोगको अपेक्षा गरेको बताए ।
जनप्रतिनिधि नभएको अवस्थामा पनि स्थानीय तहका कर्मचारीले उत्कृष्ट काम गरेको भन्दै पौडेलले देशको समृद्धि कर्मचारीको साथ विना संभव नभएको बताए ।
‘कर्मचारीले जति धेरै सहयोग गर्छ उति नै चाँडो समृद्ध नेपाल निर्माण गर्न सकिन्छ’, मुख्यमन्त्री पौडेलले भने, ‘उत्कृट काम गर्ने कर्मचारीहरुको प्रदेश सरकारले मुल्याङ्कन गर्छ ।’ साथै उनले स्थानीय तहका कर्मचारी र निजामती कर्मचारीबिच भेदभाव नहुने बताए । ‘कर्मचारी समान् हुन्, कसैलाई काखा कसैलाई पाखा गरिन्न’, उनले भने ।
कार्यक्रममा बोल्दै स्थानीय तह कर्मचारी मिलन केन्द्र नेपालका केन्द्रीय अध्यक्ष विक्रम महर्जनले राज्यले स्थानीय तहका कर्मचारीलाई उपेक्षा गरेको गुनासो गरे । ‘निजामती र स्थानीय तहका कर्मचारीलाई राज्यले विभेदकारी नीति अवलम्वन गरेकाले हामी वर्षौदेखि पीडित बन्दै आएका छौं’, उनले भने,‘सबैलाई समान ब्यवहार गर्ने कानून निर्माणको लागि म प्रदेश सरकारसँगआग्रह गर्छु ।’
कार्यक्रममा राष्ट्रियसभा सदस्य रामचन्द्र राई, प्रदेशसभा सदस्य प्रेमबहादुर पुलामी, जिल्ला समन्वय समितिका अध्यक्ष रघुनाथ खुलाल लगाएतले बोलेका थिए ।
भेलाको अवसरमा स्थानीय तह कर्मचारीबाट हाल कैलाश गाउँपालिका अध्यक्ष भएका टंक मोक्तानलाई सम्मान गरिएको थियो । उनी स्थानीय तह निर्वाचन अघि मकवानपुरको साविक भार्ता गाविसका सहायक सचिव थिए । भेलामा देशका ७७ जिल्लाका दुई सय ५० जना प्रतिनिधिहरुको सहभागिता रहेको थियो ।
फोटो क्याप्सन ः
१) भेलालाई सम्बोधन गर्दै मुख्य मन्त्री पौडेल ।
२) भेलाको उद्घाटन गर्दै मुख्यमन्त्री पौडेल ।
३) भेलामा सहभागि अतिथिहरु ।
४) भेलामा मकवानपुरको कैलाश गाउँपालिकाका अध्यक्ष टंक मोक्तानलाई सम्मान गरिँदै । फोटो÷कृष्ण सारु मगर ।
प्रतिक्रिया दिनुहोस !
