गौरी गाईको मासु भाग लगाउँदै गर्दा चार पक्राउ

हेटौंडा : संरक्षित वन्यजन्तु गौरी गाईको सिकार गर्ने चार जनालाई पर्सा राष्ट्रिय निकुञ्जको सुरक्षामा खटिएका नेपाली सेनाले पक्राउ गरेका छन्। गौरी गाईको सिकार गरी मासुको तयारी गर्दागर्दै मनहरी गाउँपालिका ४ मुलखोलाबाट पर्सा राष्ट्रिय निकुञ्ज र मध्यवर्ती क्षेत्र व्यवस्थापन समितिले उनीहरुलाई पक्राउ गरेको हो ।

पक्राउ पर्नेमा मुलखोलाका ३४ वर्षीय सूर्यबहादुर गोले, ५४ वर्षीय सिंगराम स्याङ्तान, ५८ वर्षीय मानबहादुर मुक्तान र ३६ वर्षीय लालबहादुर थिङ रहेका छन् । गाउँलेको सहभागितामा गौरी गाई मारेर मासु काटिरहेको अवस्थामा मध्यवर्ती क्षेत्र व्यवस्थापन समिति अध्यक्ष पदमबहादुर तितुङ नेतृत्वको टोलीले उनीहरुलाई पक्राउ गरेको हो । उनीहरुका साथबाट तीन क्विन्टल गौरीगाईको मासु, मासु काट्न प्रयोग भएका हतियार बरामद भएको निकुञ्जका वार्डेन हरिभद्र आचार्यले बताए ।

शुक्रबार दिउँसो सुराकीको आधारमा पक्राउ परेका उनीहरुमाथि थप अनुसन्धान भइरहेको तितुङले जानकारी दिए । अनुसन्धानपछि जिल्ला अदालत मकवानपुरमा मुद्दा दायर गरिने आचार्यले बताए ।

मध्यवर्ती क्षेत्र व्यवस्थापन समितिका अध्यक्ष तितिुङका अनुसार गाउँमा एक सय जनाको हाराहारीमा मानिस भेला भई गौरी गाई मारेर मासु काटिरहेका थिए । ‘नेपाली सेनासहितको हाम्रो टोली पुग्नासाथ गाउँलेहरु भागे’, उनले भने । घटनाको बारेमा अनुसन्धान भइरहेको र पक्राउ परेकाहरुलाई राष्ट्रिय निकुन्ज तथा वन्यजन्तु संरक्षण ऐन अन्तर्गत मुद्दा चलाउने तयारी भइरहेको वार्डेन आचार्यले बताए ।

उनका अनुसार गौरी गाई, गँैडा, बाघ, हात्ती, हिउँ चितुवा, कस्तुरी र ध्वाँसेको सिकार गरेमा राष्ट्रिय निकुन्ज तथा वन्यजन्तु संरक्षण ऐन अनुसार पाँच वर्षदेखि १५ वर्षसम्म कैद, ५० हजारदेखि पाँच लाख रुपैयाँसम्म जरिवाना वा दुबै हुनसक्छ ।