ललितपुर : क्रियापुत्री भवन निर्माण गर्न ललितपुर हात्तीवनस्थित शिव पाञ्चायन मन्दिर परिसरमा श्रीमद्भागवत सप्ताह सुरु भएको छ । ऐरावत टोल सुधार समिति, हात्तीवन सामुदायिक सेवा समाज र विश्वशान्ति अभियान नेपालको संयुक्त आयोजनामा शनिबारदेखि सुरु भएको सप्ताह चैत ३ गतेसम्म सञ्चालन हुनेछ ।
एक सय आठ भागवतका संकल्पकर्ता भागवत किंकर आचार्य मुरलीधर पोखरेलको संकल्पमा सप्ताह सुरु भएको हो । पहिलो दिन शनिबार कलश यात्रा गरिएको थियो ।
सप्ताह मूलसमितिका संयोजक मधुकर केसीले समस्त पितृहरुको उद्धारको भावना र विश्वशान्ति विश्वकल्याण कामनासहित थालिएको एक सय आठ भागवतका क्रममा क्रियापुत्री भवन र केही रकम भागवत विद्यालय निर्माणार्थ समेतका लागि सप्ताह लगाउने अवसर प्राप्त भएको बताए ।
समितिसदस्य नारायणी बञ्जाराका अनुसार, सप्ताहमा पितृ पूजन, विशिष्ट विद्धानबाट विशेष प्रवचन, मण्डप पूजनसमेत हुनेछ ।
सप्ताहमा राष्ट्रिय कलाकारहरुबाट भक्तिसंगीत प्रस्तुत हुनेछ । समितिका अर्का सदस्य किरण नेपालले भागवत कथाका माध्यमबाट आनन्द, सुख र आत्मिक शान्तिको प्रत्यक्ष अनुभव गर्न सबैलाई आह्वान गर्दै सप्ताहमा सहयोग गर्नेलाई विशेष सम्मान गरिने जानकारी दिए ।
प्रतिक्रिया दिनुहोस !
