काठमाडौँः नेकपा माओवादी केन्द्रका अध्यक्ष पुष्पकमल दाहाल प्रचण्डले जनताले वाम गठबन्धनलाई गरेको भरोसालाई एक्सनबाट पुरा गर्नुपर्ने बताएका छन् ।
प्रधानमन्त्री केपी शर्मा ओलीको विश्वासको मतका लागि आइतवार बसेको प्रतिनिधि सभाको बैठकमा बोल्दै अध्यक्ष दाहालले देशको समृद्धिका लागि वाम गठबन्धनको सरकार बनेको बताउँदै अब भाषण होइन जनताले एक्सन खोजेको बताए ।
‘अब देशमा स्थिरता र विकासको आवश्यकता छ । त्यसकै लागि गठबन्धन बनयौँ । साझा घोषणापत्र बनायौँ, त्यही बेला विश्वासको मत जनतासँग माग्यौँ’, दाहालले भने, ‘गठबन्धनको जिम्मेवार सदस्यको हैसियतमा लिखित रुपमा राष्ट्रपतिलाई पत्र बुझाएर प्रधानमन्त्रीमा केपी ओलीलाई प्रधानमन्त्रीमा समर्थन छ भनिसकेको छु । अहिलेको औपचारिकता मात्र हो । अब केही गर्ने समय आएको छ ।’
प्रधानमन्त्रीप्रति गहिरो विश्वास रहेको विश्वास दिलाउँदै दाहालले अब देशले अराजकता, बेथिति र विकृति होइन विकासको नयाँ युग चाहेको बताए । ‘अब देश नयाँ युगमा जानुपर्छ भनेर जनताले हामीलाई भरोसासहित मत दिएका हुन्’, दाहालले जोड दिए, ‘अब हामीले भाषण र मार्मिक उपदेशबाट होइन, एक्सानबाट जनताका आकांक्षा सम्बोधन गर्न सक्नुपर्छ ।’
दाहालले ओलीतर्फ लक्षित गर्दै अगाडि भने, ‘तपाईंका हात बलिया छन् । दुईतिहाइ जनताले समर्थन गरेका छ न् । भ्रष्टाचार नियन्त्रण गर्न कठोर कदम चाल्नुपर्छ ।’
दाहालले ओली सरकारलाई सबै खालका कु–संस्कृतिको अन्त्य गर्ने गरी भरोसा गरेको बताउँदै प्रतिबद्धता अनुसार सरकारले काम गर्नुपर्ने उल्लेख गरे ।
‘अब नयाँ युगको सुरुवात हुने छ । यो एउटा अवसर हो । राजनीतिक स्थिरता, आर्थिक समृद्धि, सुशासन र शान्तिका लागि प्रतिनिधिसभा र सरकार सत्तापक्ष र प्रतिपक्ष सबै एतिहासिक अवसर हो’, दाहालले अगाडि थपे, ‘हामीले धेरै अप्ठेरासँग जुधेर यहाँ आइपुगेका छौँ । शान्तिप्रक्रियाका संवेदनशील पक्षलाई पूरा गरेका छौँ । र, हामीले जनताका अगाडि गहिरो कबुल गरेका छौँ ।’
दाहालले पटक पटक अब जनताले भाषण होइन एक्सन खोजेको प्रधामन्त्री ओलीलाई सम्झाए । ‘जनताले सीधै परिणाम खोजेको छ’, दाहालले भने, ‘कैलालीको घटनामा सरकारले सीधै कारबाही गर्नुपर्छ । एक्सन लिनुपर्छ । केही कुराले रोक्न सक्दैन ।
प्रतिक्रिया दिनुहोस !
