काठमाडौँः कान्तिपुरविरुद्धको अदालतको अवहेलनासम्बन्धी मुद्दामा आइतवार दिनभर इजलासमा बसेका सर्वोच्चका न्यायाधीश चोलेन्चद्र शमशेर जबराले सोमबार इजलासमा नबस्ने निर्णय गरेका छन् ।
इजलासमा नबस्ने निर्णयसँगै राणाको न्यायिक आचरण, कार्यक्षमता र न्यायाधीशमा हुनुपर्ने न्यूनतम् नैतिकताको विषयमा गम्भीर प्रश्न समेत उठाइएको छ ।
राणाले आइतवार भएको बहसमा अदालतको प्रतिरक्षामा बहस गर्ने कानुन व्यवसायी र अबहेलना अभियोग लगाइएका डा. गोविन्द केसीको पक्षमा भने दिनभर बहस सुनेका थिए ।
तर, राणाले बेन्च बहिष्कार गर्ने निर्णय लिएपछि रातारात चलखेल र स्वार्थ केन्द्रको गठजोड रहेको आशंका समेत गरिएको छ । सर्वोच्च अदालत बार एशोसियनका एक अधिवक्ताले पहिलो दिन सुनुवाइमा बसेका राणाले दोस्रो दिन बेन्च बहिष्कार गर्नुले उनको भूमिकामा गम्भीर प्रश्न उठाएको प्रतिक्रिया दिए ।
‘यो मुद्दालाई हामीले नजिकबाट हेरिरहेका छौँ’, उनले भने, ‘न्यायाधीश राणाले पहिलो दिन नै सुनुवाइमा सहभागी हुनुहुन्थ्यो । पहिलो दिन बसेर दोस्रो दिन बहिष्कारको निर्णय गर्ने उनको निर्णयले धेरै किसिमका आशंका जन्माएको छ ।’
राणा इजलासबाट बाहिरिएपछि कान्तिपुरसँग सम्बन्धित सोमबारको सुनुवाइ स्थगित गरिएको छ । चोलेन्द्रको बेन्च बहिष्कारसँगै नेपालको इतिहासमै न्यायपालिकाको अबहेलासम्बन्धी घटनाले नयाँ मोड लिने संकेत देखिएको छ ।
अवहेलना मुद्दा प्रकरणमा बेन्च बहिष्कार गरेपछि प्रधानन्यायाधीश पराजुलीले राणामाथि कारबाही गर्न सक्ने अनुमानसमेत गरिएको छ । न्याय क्षेत्रमा राणाको गतिविधिलाई लिएर यसअघि पनि गम्भीर आलोचना हुँदै आएको थियो ।
कार्यक्षमता र नैतिकताको प्रश्न उब्जाउँदै सर्वोच्चकी तत्कालीन न्यायाधीश सुशीला कार्कीसहितको बेन्चले राणमाथि कारबाहीका लागि न्यायपरिषद्मा लेखेर समेत पठाएको थियो । न्यायिक वृत्तमा दिनभर सुनुवाइ गरेर एकाएक इजलास बहिष्कार गर्ने राणाको निर्णयमाथि न्यूनतम् नैतिकता, न्यायाधीशको आचारसंहिता र मर्यादाहीन कार्य भन्दै आलोचना सुरु भएको छ ।
प्रधानन्यायाधीश पराजुलीले गत साउनमा नै अवकाश लिनुपर्ने कारण बताउँदै राणाले बेन्चमा बस्न नसक्दै टिप्पणी लेख्दै सुनुवाइ प्रक्रियालाई अवरुद्ध गरेका थिए ।
मुद्दा तयारी
पहिलो दिन सुनुवाइमा बसेर दोस्रो दिन बेन्च बहिष्कार गर्ने राणाको निर्णयपछि उनीविरुद्ध अदालतको अवहेलना मुद्दा चलाउने तयारी सर्वोच्चले थालेको छ ।
अदालतको न्यायिक प्रक्रियालाई प्रभावित गर्ने गरी राणाले टिप्पणी लेखेर बेन्च बहिष्कार गरेपछि उनीमाथि अवहेलन मुद्दा चलाउने तयारी थालिएको सर्वोच्च स्रोतले जानकारी दिएको छ।
प्रतिक्रिया दिनुहोस !
