पार्टी भागबण्डामा न्यायाधीश बन्दा सर्वोच्चमा विवाद : कमल थापा

काठमाडौं : राष्ट्रिय प्रजातन्त्र पार्टी (राप्रपा)का अध्यक्ष कमल थापाले दालतमा हुँदै आएको राजनीतिक भागबण्डाले सर्वोच्च अदालतमा अहिलेको विवाद सिर्जना भएको बताएका छन् । अदालतभित्रको विवाद र छाडापनको अन्त्य गर्न २०६२/६३ को परिवर्तनपछि अदालतमा भएको राजनीतिकरण भएको उनको भनाइ छ ।

थापाले यस्तो विवाद र छाडापनको अन्त्यका लागि २०६२/६३ पछिको बाटो सच्याउनुपर्ने साहस आवश्यक भएको बताएका छन् । उनले २०६२/६३ को राजनीतिक परिवर्तनपछि दलहरुले न्यायाधीशमा समेत भागबण्डा गरेपछि अहिलेको स्थिति सिर्जना भएको दाबी गरेका छन्।

‘सर्वोच्च अदालतमा हाल देखिएको विवाद र छाडापनको मूलजड २०६२/६३ को परिवर्तनलाई संस्थागत गर्नेक्रममा भएको समाजको तिव्र राजनीतिकरण, राज्य संयन्त्रको पार्टीकरण र कसैसँग डराउनु नपर्ने जवाफदेही विहीन संस्कार र सिण्डिकेटतन्त्र हो’, थापाले ट्विटमा थप लेखेका छन्, ‘यसलाई सच्याउन २०६२/६३ पछिको गलत बाटो परिवर्तन गर्ने साहस आवश्यक छ ।’

सर्वोच्च अदालतमा हाल देखिएको विवाद र छाडापनको मूलजड ६२/६३ को परिवर्तनलाई संस्थागत गर्नेक्रममा भएको समाजको तिव्र राजनीतिकरण, राज्यसंयन्त्रको पार्टीकरण र कसैसंग डराउनु नपर्ने जवाफदेही विहीन संस्कार र सिण्डिकेटतन्त्र हो।यसलाई सच्याउन ६२/६३ पछिको गलत बाटो परिवर्तन गर्ने साहस आवश्यक छ

— Kamal Thapa (@KTnepal) March 13, 2018