काठमाडौँ: युएस-बंगला विमान दुर्घटनामा परेपछि बंगलादेशका नागरिक उड्ययन मन्त्रीसहितको उच्चस्तरीय टोली मंगलबार काठमाडौँ आइपुगेको छ ।
बंगलादेशका नागरिक उड्ययन तथा पर्यटन मन्त्री एकेएम शाहजाह कमलसहितको टोली मंगलबार अपरान्ह त्रिभुवन विमानस्थलमा अवतरण गरेको हो ।
सोमबार भएको युएस-बंगलाको बोबार्डियर ड्यास क्यु४०० सिरिजको जहाज दुर्घटनापछिको अवस्थाबारे नेपाली पक्षसँग छलफल तथा घटनास्थलको अनुगमनका लागि बंगलादेशी मन्त्रीको टोली काठमाडौँ आइपुगेको हो ।
बंगलादेशकी प्रधानमन्त्री शेखहसिना वाजेदले विमान दुर्घटनाबारे बुझ्न मन्त्रीसहितको टोली पठाएकी हुन् । नेपाल र बंगलादेशबीच विमान दुर्घटनालाई लिएर विवाद भइरहेका बेला उनको आगमन भएको हो ।
नेपाली पक्षले एयर ट्राफिक कन्ट्रोलरले भनेको निर्देशन अनुसार दक्षिणबाट अवतरण नगरी उत्तर दिशातिर गएर एलाइन्मेन्ट नमिलाई अवतरण गराउँदा जहाज दुर्घटनामा परेको बताएको छ । बंगलादेशले भने एटिसीको गलत निर्देशनका कारण विमान दुर्घटनामा परेको दाबी गर्दै आएको छ ।
५० जनाको ज्यान जानेगरी भएको विमान दुर्घटनामा नेपाली र बंगलादेशका धेरै नागरिकको ज्यान गएको थियो । मन्त्रीसँगै बंगलादेशको नागरिक उड्ययन प्राधिकरणका सुरक्षा निर्देशक हजरत शाहाजल पनि टोलीमा रहेका छन् ।
सोमबार ढाकाबाट ६७ यात्रु र ४ चालक दलका सदस्य लिएर उडेको युएस-बंगला एयरलाइन्सको जहाज त्रिभुवन विमानस्थलमा दुर्घटना हुँदा अहिलेसम्म ५० जनाको ज्यान गइसकेको छ ।
दुर्घटनामा परेको यो जहाजमा ३३ जना नेपाली, ३२ जना बंगलादेशी, २ जना माल्दिभ्सका, एकजना चिनियाँ र चारजना चालक दलका सदस्य सवार थिए ।
प्रतिक्रिया दिनुहोस !
