काठमाडौं : नेपाली कांग्रेसका सभापति एवं पूर्व प्रधानमन्त्री शेरबहादुर देउवाले लोकतन्त्रको सुदृढीकरणका लागि विपक्षी दलको भूमिका महत्वपूर्ण हुने बताए ।संघीय संसद् र प्रदेशसभा सदस्यका लागि कांग्रेसद्वारा बुधबार आयोजित अभिमुखिकरण कार्यक्रममा उनले विपक्षमा रहेको बेला पार्टीको भूमिका सरकारमा हुँदा भन्दा बढी सबल हुनु पर्ने बताए ।
सभापति देउवाले २००७ सालदेखि प्रजातन्त्रका लागि लड्दै आएको कांग्रेस यतिखेर संघीय संसद् र प्रदेशसभामा प्रतिपक्षको भूमिकामा रहेको उल्लेख गर्दै भने, ‘संघीय लोकतान्त्रिक गणतन्त्रको संस्थागत विकास र सुदृढिकरणका लागि अहिले कांग्रेसको काँधमा महत्वपूर्ण चुनौती आएको छ, त्यसको सामना गर्न एकतावद्ध हुँदै अध्ययनशील हुन आवश्यक छ’ ।
संसद्मा विपक्षीले कस्तो मुद्दा उठाए भनेर जनताले हेरिरहने भएकाले अध्ययन गरेर तर्कका साथ प्रस्तुत हुनुपर्ने उनले बताए । त्यसकै आधारमा आगामी निर्वाचनमा जनमत बन्ने समेत उनको भनाइ छ ।’
कार्यक्रममा पार्टीका वरिष्ठ नेता रामचन्द्र पौडेलले संसद्मा जनताका मुद्दा कसरी उठाउने त्यसका लागि अध्ययनको आवश्यकतापर्ने भन्दै विरोधका लागि विरोध नभइ तर्कका आधारमा जनसवालका मुद्दा उठाउन आग्रह गरे ।
काँग्रेस महामन्त्री डा. शशांक कोइरालाले संसद्मा प्रतिपक्षी दलको भूमिका महत्वपूर्ण हुने बताउँदै गुण र दोषका आधारमा मुद्दा सम्बोधन गर्नुपर्नेमा जोड दिए ।
रासस
प्रतिक्रिया दिनुहोस !
