नयाँदिल्ली: भारतको उत्तरप्रदेश राज्यस्थित दुईवटा सिटमा भएको उपचुनामा भारतीय जनता पार्टीलाई धक्का लागेको छ । मुख्मन्त्री योगी आदित्यनाथको गोरखपुर र उपमुख्यमन्त्री केशवप्रसाद मौर्यको फूलपुर लोकसभा सिटमा समाजवादी पार्टीले फराकिलो अग्रता बनाएको छ ।
भोट गणना जारी रहँदा दुवै सिटमा सपाले भाजपालाई भारी मतले पछाडि छाडेको हो । गोरखपुरमा २० औँ चरणको मत गनिसक्दा सपाका प्रवीण निषाद ३,०७,६२७ मतका साथ पहिलो नम्बरमा छन् ।
सपाका प्रवीणलाई पछ्याइरहेका भाजपाका उम्मेदवार उपेन्द्र दत्त शुक्लालाई अहिलेसम्म २,७९,३६९ मत मिलेको छ । यसैबीच लखनउमा विधानसभाका प्रतिपक्षी नेता राम गोविन्द चौधरीले मायावतीसँग भेट गरेका छन् ।
११ मार्चमा दुवै सीटका लागि उपचुनाव भएको थियो । सन् २०१४ मा गोरखपुरबाट भाजपाका योगी आदित्यनाथ लगातार पाँचौ पटक विजयी भएका थिए ।
फूलपुर निर्वाचन क्षेत्रमा पनि पहिलो पटक भाजपाले जितेको थियो । यस उपचुनावमा भाजपालाई रोक्न बहुजन समाजवादी पार्टी (बसपा) ले समाजवादी पार्टी (सपा) उम्मेदवारलाई सघाएको थियो । उता कांग्रेसले पनि दुवै क्षेत्रमा आफ्ना उम्मेदवार उठाएको थियो ।
बुधवार शुरुवातमा गोरखपुरको रुझान भाजपातर्फ देखिएको थियो । यसकारण सपाले मतगणनामा गडबडीको आरोप पनि लगाएको थियो ।
प्रतिक्रिया दिनुहोस !
