काठमाडौं : नेपालको अस्थिर राजनीति किनारा लाग्दै गर्दा न्यायपालिकाभित्रको विवादको विषय बुधबार र बिहीबार खुबै पेचिलो बन्यो । दोस्रो पटक राष्ट्रपतिको शपथ लिएकी राष्ट्रपति विद्यादेवी भण्डारीको शपथग्रहण कार्यक्रम र न्यायाधीशको भूमिकाका विषयले बिहीबार साँझसम्म खुबै चर्चा पायो ।
तर, दुई दिनको सबै अन्तरकथालाई नेपाली क्रिकेट टोलीको सफलताले एकाएक बिर्साइदिएको छ । केहीबेर अघिसम्म राजनीति र न्यायालयका विषयमा गालीगलौजले रंगिएका सामाजिक सञ्जालका भित्ता एकाएक क्रिकेटमय बन्यो । एकदिवसीय विश्वकप छनोटअन्तर्गत प्ले अफ खेलमा नेपालले पपुवान्युगिनीलाई ६ विकेटले पराजित र नेदरल्यान्ड्सले हङकङलाई ४४ रनले हराएपछि नेपालले एकदिवसीय क्रिकेट टोलीको मान्यता पायो ।
यस खुसीलाई सामाजिक सञ्जालमा राजनीतिज्ञदेखि सर्वसाधारणसम्मले साटेका छन् । पूर्वप्रधानमन्त्री एवं नेकपा माओवादीका अध्यक्ष पुष्पकमल दाहाल (प्रचण्डले) नेपाल एकदिवसीय मान्यता पाउन सफल भएकोमा खुसी व्यक्त गर्दै भनेका छन्- ‘नेपाललाई खेलकुदको क्षेत्रबाट विश्वसामु चिनाउन क्रिकेट टोलीले खेलेको भूमिका प्रशंसनीय छ । हाम्रो यो ठूलो सफलता हासिल गर्न मेहनत गर्ने नेपाली क्रिकेट टिमलाई हार्दिक बधाई तथा थप प्रगतिको कामना ।’
पूर्वप्रधानमन्त्री एवं नेपाली कांग्रेसका सभापति शेरबहादुर देउवाको ट्विट गर्दै खेलाडी र प्रशिक्षकसहित सिंगो नेपालीलाई बधाई दिएका छन् । कांग्रसकै युवा नेता गगन थापाले ट्विटमार्फत नेपाली टोलीलाई बधाई दिँदै भनेका छन्- ‘लामो समयको सपना समकार ।’
यसैगरी कांग्रेस नेता रामचन्द्र पौडेलले ऐतिहासिक सफलताका लागि नेपाली क्रिकेटलाई बधाई भन्दै खुसी साटेका छन् । क्यानकी पूर्वसीईओ भावना घिमिरेले टोलीलाई बधाई दिएकी छन् । टोलीका कप्तान पारस खड्काले सबैलाई बधाई दिँदै नेपालीको जित भन्दै गर्व गरेका छन् । क्रिकेट टोलीको फोटो फेसबुकमा पोस्ट गर्दै प्रशिक्षक जगत टमटाले पनि सबै नेपालीसँग खुसी साटेका छन् । एमालेका नेता प्रदीप ज्ञवालीले पनि खुसी साट्दै नेपाली टोलीलाई बधाई दिएका छन् ।
प्रतिक्रिया दिनुहोस !
